சென்னை: இரு தொகுதிகளிலும் முக்கியமான கூட்டணி கட்சிகள் இல்லாமல் தனித்துப் போட்டியிட்ட திமுக 2-ம் இடத்தைப் பிடித்துள்ளது. கடந்த ஏப்ரல் பொதுத் தேர்தலில் தாராபுரத்தில் 64,373 வாக்குகளை பெற்ற திமுகவுக்கு, தற்போது 57,370 வாக்குகள் கிடைத்துள்ளன.
இதில் வாக்கு எண்ணிக்கை குறைந்தபோதும், அதன் வாக்கு சதவீதம் அதே நிலையில் நீடிக்கிறது. மதுராந்தகத்தில் கடந்த முறை 59,838 வாக்குகளுடன் 3-ம் இடத்தில் இருந்த திமுக, தற்போது 54,008 வாக்குகளுடன் 2-ம் இடத்துக்கு முன்னேறியுள்ளது. எனினும், அதன் வாக்கு சதவீதம் சுமார் ஒரு சதவீதம் குறைந்துள்ளது.
திமுக தனக்கான வாக்கு வங்கியை தக்க வைத்திருப்பது இந்த முடிவுகள் மூலம் தெரிகிறது. எனினும், இதை மட்டுமே வைத்துக் கொண்டு ஆளுங்கட்சியான தவெகவின் எழுச்சியை வீழ்த்திவிட முடியுமா என்ற கேள்வி எழுகிறது.
இந்த 32 சதவீத வாக்குகளைத் தாண்டி, முதல்முறை வாக்காளர்கள், இளைஞர்கள், நடுநிலையாளர்களை ஈர்த்தால் மட்டுமே இனி வரும் தேர்தல்களில் வெற்றியை வசப்படுத்த முடியும். காலத்துக்கேற்ப புதிய தேர்தல் வியூகங்களை வகுக்க வேண்டிய கட்டாயம் திமுகவுக்கு ஏற்பட்டுள்ளது. அதற்கேற்ப, கட்சி மறுசீரமைப்புப் பணிகளை திமுக விரைந்து முன்னெடுக்குமா என்பதே தற்போதைய எதிர்பார்ப்பாக உள்ளது.