சென்னை: ரூ.400 கோடி முறைகேடு வழக்கில் அன்பில் மகேஸிடம் போலீஸார் 2-வது நாளாக தீவிர விசாரணை நடத்தினர்.
கடந்த திமுக ஆட்சியின்போது தனியார் பள்ளிகளுக்கு நிரந்தர அங்கீகாரம் வழங்குவதற்காக ரூ.400 கோடிக்கு மேல் வசூலித்து முறைகேடு நடந்ததாக தனியார் பள்ளிகள் சங்க பொதுச்செயலாளர் இளங்கோவன் அளித்த புகாரின்பேரில், முன்னாள் அமைச்சர் அன்பில் மகேஸ் கடந்த அக்டோபர் 26-ம் தேதி கைது செய்யப்பட்டு புழல் சிறையில் அடைக்கப்பட்டார்.
இந்நிலையில், அன்பில் மகேஸை கடந்த 2-ம் தேதி முதல் 4-ம் தேதி வரை 3 நாட்கள் போலீஸ் காவலில் வைத்து விசாரிக்க நீதிமன்றம் அனுமதி அளித்தது. இதையடுத்து போலீஸ் காவலில் எடுக்கப்பட்ட அன்பில் மகேஸிடம் முதல் நாளில் பல்வேறு கேள்விகளை கேட்டு விசாரணை நடத்தினர்.
2-வது நாளான நேற்று விசாரணை தீவிரமடைந்தது. பெண் தொழில் அதிபரும் ஆடை வடிவமைப்பாளருமான சண்முகப்பிரியா வீட்டில் அண்மையில் நடத்தப்பட்ட சோதனையில் கைப்பற்றப்பட்ட ஆவணங்கள் அடிப்படையிலும் அன்பில் மகேஸிடம் கேள்விகள் எழுப்பப்பட்டதாக கூறப்படுகிறது.
மேலும், இந்த முறைகேட்டில் பெறப்பட்ட பணம் பல்வேறு நபர்களுக்கு பிரித்துக் கொடுக்கப்பட்டதா? அதில் யாருக்கெல்லாம் தொடர்பு உள்ளது என்பது குறித்தும் போலீஸார் விசாரித்து வருகின்றனர்.
அன்பில் மகேஸின் மனைவி ஜனனியிடமும் விசாரணை நடத்த போலீஸார் திட்டமிட்டுள்ளனர். இதற்கிடையே, அன்பில் மகேஸிடம் நடத்தப்பட்ட விசாரணையில் கிடைத்த தகவல்களின் அடிப்படையில் மேலும் சில முக்கிய நபர்கள் இந்த வழக்கில் சிக்க வாய்ப்புள்ளதாக போலீஸ் வட்டாரங்கள் தெரிவிக்கின்றன.
இன்று 3-வது நாளாக விசாரணை நடைபெற உள்ளது. விசாரணை முடிந்ததும் மாலை 5 மணிக்கு அன்பில் மகேஸை நீதிமன்றத்தில் ஆஜர்படுத்த போலீஸார் நடவடிக்கை மேற்கொண்டுள்ளனர். பின்னர் அவர் மீண்டும் சிறையில் அடைக்கப்படுவார்.