சென்னை: திமுக முன்னாள் அமைச்சர் அன்பில் மகேஸின் ஜாமீன் மனுவை தள்ளுபடி செய்த சென்னை ஊழல் தடுப்பு சிறப்பு நீதிமன்ற நீதிபதி, மாணவர்கள் நலனே முக்கியம் என்று கருத்து தெரிவித்துள்ளார்.
முந்தைய திமுக ஆட்சியில், தமிழகத்தில் உள்ள தனியார் பள்ளிகளுக்கு நிரந்தர அங்கீகாரம் உள்ளிட்ட அனுமதிகளை பெற்றுத் தருவதாகக் கூறி 177 தனியார் பள்ளி நிர்வாகிகளிடம் கட்சி நிதி என்ற பெயரில் ரூ.400 கோடிக்கு மேல் வசூலித்து முறைகேட்டில் ஈடுபட்டுள்ளதாக புகார் எழுந்தது. இதுகுறித்து சென்னை மத்திய குற்றப்பிரிவு போலீஸார் பி.டி.அரசகுமார், முன்னாள் எம்எல்ஏ முத்துக்குமார், முன்னாள் பள்ளிக் கல்வித்துறை அமைச்சர் அன்பில் மகேஸ், சரவணன், ராஜா, சுரேஷ், தினேஷ் உள்ளிட்டோர் மீது வழக்குப் பதிவு செய்துள்ளனர். இதில், பி.டி.அரசகுமார் ஜாமீனில் விடுவிக்கப்பட்டுள்ளார்.
இந்த வழக்கில் கடந்த அக்டோபர் 26-ம் தேதி கைது செய்யப்பட்ட முன்னாள் அமைச்சர் அன்பில் மகேஸ், நீதிமன்ற காவலில் சிறையில் உள்ளார். கடந்த அக்டோபர் 29 அன்று நீதிமன்றத்தில் சரணடைந்த முத்துக்குமார் சிறையில் அடைக்கப்பட்டுள்ளார். சரவணன், தினேஷ் தவிர்த்து மற்றவர்கள் கைதாகி ஜாமீனில் விடுவிக்கப்பட்டுள்ளனர்.
இந்நிலையில், அன்பில் மகேஸூக்கு ஜாமீன் கோரி தாக்கல் செய்யப்பட்ட மனு மீதான விசாரணை சென்னை ஊழல் தடுப்பு சிறப்பு நீதிமன்றத்தில் நீதிபதி எல்.எஸ்.சத்தியமூர்த்தி முன்னிலையில் கடந்த 5-ம் தேதி நடந்தது. அப்போது அன்பில் மகேஸ் தரப்பில் மூத்த வழக்கறிஞர் அபுடுகுமார் ராஜரத்தினம், வழக்கறிஞர் ரிச்சர்ட்ஸன் வில்சன் ஆகியோரும், காவல் துறை தரப்பில் மாநில அரசு தலைமை குற்றவியல் வழக்கறிஞர் ஆர்.ஜான் சத்யன் மற்றும் சிறப்பு அரசு குற்றவியல் வழக்கறிஞர் கே.உஷா ராணி ஆகியோரும் ஆஜராகி வாதிட்டனர். இருதரப்பு வாதங்களையும் கேட்ட நீதிபதி எல்.எஸ். சத்தியமூர்த்தி தீர்ப்பை 10-ம் தேதிக்கு (நேற்று) தள்ளி வைத்தார்.
இந்நிலையில், அன்பில் மகேஸின் ஜாமீன் மனுவை தள்ளுபடி செய்து நேற்று நீதிபதி தீர்ப்பளித்தார். நீதிபதி பிறப்பித்துள்ள விரிவான உத்தரவில் கூறியிருப்பதாவது: தனியார் பள்ளிகளுக்கு நிரந்தர அங்கீகாரம் உள்ளிட்ட அனுமதிகளைப் பெற்றுத் தருவதாகக் கூறி பி.டி.அரசகுமாரும், முத்துகுமாரும் தனியார் பள்ளி நிர்வாகிகளிடம் இருந்து கோடிக்கணக்கில் பெரும் தொகையை வசூலித்து, அதை கட்சி நிதி என்ற பெயரில் பள்ளிக் கல்வித் துறை அமைச்சராகப் பதவி வகித்த அன்பில் மகேஸிடம் லஞ்சமாக கொடுத்துள்ளனர் என குற்றம் சாட்டப்பட்டுள்ளது.
இந்த வழக்கில் சாட்சிகளாகச் சேர்க்கப்பட்டுள்ள தனியார் பள்ளி நிர்வாகிகள் அளித்த வாக்குமூலத்தின் அடிப்படையில், அன்பில் மகேஸ் மீதான குற்றச்சாட்டுகளுக்கு ஆரம்பகட்ட முகாந்திரம் உள்ளது. அன்பில் மகேஸ், அவரது மனைவி ஜனனி மற்றும் அமெரிக்காவில் உள்ள அவரது மாமியார் லதா கைலாசம் ஆகியோர் 2015-16 முதல் தற்போது வரையுள்ள 10 ஆண்டுகளுக்கான வருமான வரி கணக்குகளைச் சமர்ப்பிக்க போலீஸார் நோட்டீஸ் பிறப்பித்துள்ளனர்.
அதில், ஆடிட்டர்களின் மாற்றம் காரணமாக குறிப்பிட்ட சில ஆண்டுகளுக்கான வருமான வரி கணக்குகள் மட்டுமே தாக்கல் செய்யப்பட்டுள்ளதாகவும், எஞ்சிய கணக்கு விவரங்களும் விரைவில் தாக்கல் செய்யப்படும் என மனுதாரர் தரப்பில் உறுதியளிக்கப்பட்டுள்ளது.
லஞ்சம் கொடுக்காவிட்டால் 10 மற்றும் 12-ம் வகுப்பு மாணவர்களைத் தேர்வெழுத அனுமதிக்கமாட்டோம் என அரசகுமாரும் முத்துக்குமாரும் தனியார் பள்ளி நிர்வாகிகளை மிரட்டியதாகவும், இதுவரை ரூ.17.26 கோடிக்கான நிதிப் பரிவர்த்தனை விவரங்கள் ஆதாரப்பூர்வமாக கண்டறியப்பட்டுள்ளதாகவும் காவல் துறை தரப்பில் தெரிவிக்கப்பட்டுள்ளது.
அன்பில் மகேஸின் வீட்டில் பறிமுதல் செய்யப்பட்டுள்ள மின்னணு மற்றும் டிஜிட்டல் ஆவணங்கள் தடயவியல் துறையின் ஆய்வுக்கு அனுப்பி வைக்கப்பட்டுள்ளன. வழக்கின் புலன் விசாரணை ஆரம்பகட்டத்தில் உள்ளது. மோசடி, மிரட்டல், கட்சி நிதி என்ற பெயரில் பெரும் தொகையை வசூலித்து இருப்பது மிகப்பெரிய பொருளாதார குற்றம்.
அமைச்சராக பதவி வகித்த அன்பில் மகேஸ், அரசகுமாரின் குற்றப் பின்னணி, அன்பில் மகேஸின் கைதுக்குப் பிறகு திடீரென முத்துக்குமார் தானாக முன்வந்து நீதிமன்றத்தி்ல் சரண் அடைந்திருப்பது இந்த குற்ற வழக்கின் தீவிரத்தைக் காட்டுகிறது. மிரட்டி, கட்டாயப்படுத்தி லஞ்சம் வசூலித்துள்ளதாகக் கூறப்படுவதால், இந்தச் சூழலில் தனியார் பள்ளி நிர்வாகிகளை ஆரம்ப கட்டத்திலேயே ஊழல் தடுப்புச் சட்டத்தின் கீழ் இணை குற்றவாளிகளாகக் கருத முடியாது.
இந்த வழக்கில் மேலும் சிலரை கைது செய்ய வேண்டியிருப்பதாகவும், சமுதாயத்தில் அரசியல் பின்புலத்துடன் கூடிய செல்வாக்கு மிக்க நபரான அன்பில் மகேஸூக்கு ஜாமீன் வழங்கினால் அது புலன் விசாரணையை வெகுவாக பாதிக்கும் என்றும், சரண்டராகியுள்ள முத்துக்குமாரை காவலில் எடுத்து விசாரிக்கும் போது அவரிடம் பெறப்படும் தகவல்களின் அடிப்படையில் அன்பில் மகேஸிடம் மீண்டும் விசாரணை நடத்த வேண்டும் என்ற காவல் துறையின் வாதத்தையும் புறம் தள்ளிவிட முடியாது.
பள்ளிக் கல்வித் துறை அமைச்சராக பதவி வகித்த அன்பில் மகேஸின் தனிப்பட்ட நலனை விட பள்ளி மாணவர்களின் கல்வி மற்றும் பொதுநலனே முக்கியமானது. எனவே தற்போதுள்ள சூழலில் அன்பில் மகேஸுக்கு ஜாமீன் வழங்க முடியாது. இவ்வாறு நீதிபதி தனது உத்தரவில் கூறியுள்ளார்.
இதற்கிடையே இந்த வழக்கில் சரணடைந்துள்ள முன்னாள் எம்எல்ஏ முத்துக்குமாரை 5 நாட்களுக்கு போலீஸ் காவலில் எடுத்து விசாரிக்க அனுமதி கோரி போலீஸார் சிறப்பு நீதிமன்றத்தில் மனு தாக்கல் செய்துள்ளனர்.