சென்னை: ஆந்திர கடலோர பகுதியில் வீசிய ‘முரசு’ புயலின்போது புயல் எச்சரிக்கையை மீறி கடலுக்குள் சென்றதால் சென்னை மீனவர்களின் விசைப்படகு மூழ்கியதாகவும், அதில் பயணித்த 9 மீனவர்களில், இதுவரை 7 பேரின் உடல்கள் மீட்கப்பட்டுள்ளதாகவும் இந்திய கடலோர காவல்படை தெரிவித்துள்ளது.
இதுதொடர்பாக வெளியிடப்பட்ட செய்திக்குறிப்பில் கூறியிருப்பதாவது: ஆந்திர கடற்கரையை குறுகிய கால இடைவெளியில் கடக்க இருந்த ‘அர்னாப்’ மற்றும் ‘முரசு’ புயல்கள் குறித்து மீனவர்கள் கடலுக்குச் செல்ல வேண்டாம் என முன்னெச்சரிக்கை அறிவிப்புகள் தொடர்ந்து வழங்கப்பட்டுவந்தன. இந்நிலையில், சென்னை மீன்பிடி துறைமுகத்திலிருந்து 9 மீனவர்களுடன் கடந்த அக்.29-ம் தேதி புறப்பட்ட ‘ஸ்ரீசெங்காளம்மன்’ விசைப்படகு, முரசு புயல் எச்சரிக்கையை தொடர்ந்து ஆந்திர மாநிலம் நிசாம்பட்டினத்தில் பாதுகாப்பாக நங்கூரமிட்டு நிறுத்தப்பட்டிருந்தது.
ஆனால், எச்சரிக்கைகளை மீறி, நெல்லூர் - நரசாபூர் இடையே முரசு புயல் கரையை தொட்ட நவ.2-ம் தேதி நள்ளிரவில், உச்சக்கட்ட கொந்தளிப்பான கடல் சூழலில் அப்படகினர் நிசாம்பட்டினத்திலிருந்து மீண்டும் கடலுக்குள் புறப்பட்டுள்ளனர். புயலின் மையப்பகுதி கடக்கும் போது நிலவிய தற்காலிக அமைதியான சூழலை, புயல் முழுமையாக கடந்துவிட்டது என மீனவர்கள் தவறாக கருதி புறப்பட்டிருக்கலாம்.
இதையடுத்து, விசைப்படகு மாயமானது குறித்த தகவல் நவ.3-ம் தேதி மதியம் 12 மணியளவில் கடலோரக் காவல்படைக்கு எட்டியது. தகவல் கிடைத்த சில மணி நேரங்களிலேயே சென்னையில் இருந்து வான்வழி கண்காணிப்பு விமானம் விரைந்ததோடு, கிருஷ்ணபட்டினம் துறைமுகத்தி லிருந்து மீட்பு கப்பலும் உடனடியாக தேடுதல் பணியில் ஈடுபடுத்தப்பட்டது. தொடர்ந்து நவ.3, 4 மற்றும் 5 ஆகிய மூன்று தினங்களாக வான் மற்றும் கடல்வழியாக தீவிர மீட்பு நடவடிக்கைகள் ஒருங்கிணைக்கப்பட்டன.
இத்தொடர் தேடுதலின் பலனாக, நவ.5-ம் தேதி காலை 9.35 மணியளவில் நடுக்கடலில் மூழ்கிய நிலையில் பச்சை நிறத்திலான விசைப்படகு கண்டறியப்பட்டது.
அங்கு கடலில் மிதந்த இரு மீனவர்களின் உடல்களை கடலோர காவல்படையின் கப்பல் மீட்டது. அதே தினத்தில் கொத்தப்பட்டினம் கடற்கரையில் மேலும் 5 மீனவர்களின் உடல்கள் கரை ஒதுங்கின.
இதன்படி படகில் இருந்த 9 பேரில் இதுவரை 7 பேரின் உடல்கள் மீட்கப்பட்டுள்ள நிலையில், காணாமல் போன மற்ற இரு மீனவர்களை தேடும் பணியில் கடலோரக் காவல்படை தொடர்ந்து ஈடுபட்டு வருகிறது. வானிலை எச்சரிக்கைகளை புறக் கணித்து சூறாவளி காலங்களில் கடலுக்குள் செல்வது பெரும் ஆபத்தை விளைவிக்கும் என்பதை இச்சம்பவம் உணர்த்துகிறது. எனவே, பேரிடர் காலங்களில் அரசு மற்றும் காவல்படையின் வழிகாட்டுதல்களை மீனவர்கள் கட்டாயம் பின்பற்ற வேண்டும். இவ்வாறு அதில் தெரிவித்துள்ளது.