கோவையில் தற்கொலை செய்த மாணவர் அகிலனின் பெற்றோரிடம் ரூ.6 லட்சம் தொகைக்கான உத்தரவையும், அவரது சகோதரி நேத்ராவுக்கு அரசுப் பணிக்கான ஆணையையும் வழங்கிய அமைச்சர் வே.சம்பத்குமார்.
கோவை: பள்ளி மாணவர் அகிலன் தற்கொலை தொடர்பான வழக்கு விசாரணையை சிபிசிஐடி போலீஸாருக்கு மாற்றம் செய்து டிஜிபி மகேஷ்குமார் அகர்வால் உத்தரவிட்டுள்ளார்.
கோவை பீளமேட்டைச் சேர்ந்த அசோக்குமார் - கவுசல்யா தேவி தம்பதியின் மகன் அகிலன் (16), அரசு உதவிபெறும் பள்ளியில் 11-ம் வகுப்பு படித்து வந்தார். கடந்த 21-ம் தேதி அகிலன் வீட்டில் தூக்கிட்டு தற்கொலை செய்துகொண்டார். பள்ளியில் தலைமை ஆசிரியர் அருண்குமார், ஆசிரியர் விஜயகுமார், சக மாணவர்கள் இருவர் உள்ளிட்டோர் சாதிய கண்ணோட்டத்தில் அணுகியதால், மனம் உடைந்த அகிலன் தற்கொலை செய்து கொண்டதாக அவரது பெற்றோர் பீளமேடு காவல்நிலையத்தில் புகார் அளித்தனர்.
அந்த புகாரின்பேரில், அருண்குமார், விஜயகுமார் மற்றும் 2 மாணவர்கள் மீது தாழ்த்தப்பட்டோருக்கு எதிரான வன்கொடுமை தடுப்புச் சட்டம் உள்ளிட்ட 3 பிரிவுகளின்கீழ் போலீஸார் வழக்குப்பதிவு செய்தனர். மாணவர்கள் இருவரையும் கைது செய்து கூர்நோக்கு இல்லத்தில் அடைத்தனர்.
இதனிடையே, இந்த விவகாரத்தில் தொடர்புடைய தலைமை ஆசிரியர் அருண்குமார், ஆசிரியர் விஜயகுமார் ஆகியோரையும் கைது செய்ய வலியுறுத்தி அகிலனின் பெற்றோர், குடும்பத்தினர், ஊர்மக்கள் உள்ளிட்டோர் தெற்கு தாலுகா அலுவலகம் அருகே காத்திருப்புப் போராட்டத்தில் ஈடுபட்டு வருகின்றனர். அகிலன் உடலை பிரேதப் பரிசோதனை செய்யவும் அனுமதிக்கவில்லை.
இந்நிலையில், அகிலன் தற்கொலை வழக்கை சிபிசிஐடி போலீஸாருக்கு மாற்றம் செய்து டிஜிபி மகேஷ்குமார் அகர்வால் நேற்று உத்தரவிட்டார். வழக்கு தொடர்பான அசல் கோப்புகள், விசாரணை ஆவணங்களை உடனடியாக சிபிசிஐடி டிஜிபி வசம், மாநகர காவல் ஆணையர் ஒப்படைக்க வேண்டும். சிபிசிஐடி டிஜிபி, உரிய அதிகாரியை நியமித்து விசாரணையை தொடங்க வேண்டும் என உத்தரவில் கூறப்பட்டுள்ளது. இதைத் தொடர்ந்து அகிலனின் உடலை பிரேதப் பரிசோதனை செய்ய அவரது குடும்பத்தினர் சம்மதித்தனர்.
இந்நிலையில், தொடர் காத்திருப்புப் போராட்டத்தில் ஈடுபட்டுவந்த அகிலனின் குடும்பத்தினரை, தெற்கு தாலுகா அலுவலகத்தில், பிற்படுத்தப்பட்டோர் நலத்துறை அமைச்சர் வே.சம்பத்குமார் நேற்று சந்தித்து ஆறுதல் கூறினார். தொடர்ந்து அரசு சார்பில் ரூ.6 லட்சம் நிவாரண தொகைக்கான ஆணையை அகிலனின் பெற்றோரிடம் வழங்கினார். பின்னர், அகிலனின் சகோதரி நேத்ராவுக்கு, ஆனைக்கட்டி உண்டு உறைவிடப் பள்ளியில் இளநிலை உதவியாளராக அரசுப் பணிக்கான ஆணையையும் அமைச்சர் வழங்கினார்.