சென்னை: தாம்பரம் - செங்கல்பட்டு இடையிலான 4-வது ரயில் பாதை திட்டத்தில் முதல்கட்டமாக ரூ.273 கோடியில் செங்கல்பட்டு - கூடுவாஞ்சேரி இடையே புதிய ரயில் பாதை அமைக்கப்பட உள்ளது. இப்பணி 2 ஆண்டுகளில் நிறைவடைந்து பயன்பாட்டுக்கு வரும் என்று தெரிகிறது.
சென்னை ரயில்வே கோட்டத்தில், சென்னை – தாம்பரம் – செங்கல்பட்டு ரயில் பாதை தென்மாவட்டங்களுக்கு செல்ல பிரதான பாதையாக உள்ளது. இந்த வழித்தடத்தில் தினமும் 50-க்கும் மேற்பட்ட விரைவு ரயில்களும், 250-க்கும் மேற்பட்ட மின்சார ரயில்களும் இயக்கப்படுகின்றன.
தாம்பரத்தில் இருந்து செங்கல்பட்டு வரையிலான புறநகர் பகுதிகளில் குடியிருப்புகள், தொழிற்சாலைகள், தனியார் நிறுவனங்கள் அதிகரித்து வருகின்றன. தற்போது தாம்பரம் - செங்கல்பட்டு இடையே 3 ரயில் பாதைகள் மட்டுமே இருப்பதால் கூடுதல் ரயில்களை இயக்குவதில் சிக்கல் இருந்து வருகிறது.
இந்நிலையில் தாம்பரம் – செங்கல்பட்டு இடையே 30.2 கி.மீ. தொலைவுக்கு 4-வது ரயில் பாதை அமைக்க விரிவான திட்ட அறிக்கை தயாரிக்கப்பட்டது. இதற்கு கடந்த ஆண்டு ஜனவரியில் ரயில்வே வாரியம் ஒப்புதல் அளித்தது.
இதையடுத்து இத்திட்டத்தில் முதல்கட்டமாக கூடுவாஞ்சேரி முதல் செங்கல்பட்டு வரை ரூ.273 கோடியில் பணிகள் மேற்கொள்ள டெண்டர் வெளியிடப்பட்டுள்ளது.
இது குறித்து ரயில்வே அதிகாரிகள் கூறியதாவது: தாம்பரம் – செங்கல்பட்டு இடையே 4-வது ரயில் வழித்தடம் அமைக்க ரயில்வே வாரியம் ஒப்புதல் அளித்தது.
இதற்கான நிலம் கையகப்படுத்துவது போன்ற அடிப்படை பணிகள் முடிக்கப்பட்டுள்ளன. இதில், முதல்கட்டமாக செங்கல்பட்டு - கூடுவாஞ்சேரி வரை 21.5 கி.மீ. தொலைவுக்கு ரூ.273 கோடியில் புதிய ரயில் பாதை அமைக்கும் பணிக்கு டெண்டர் வெளியிடப்பட்டுள்ளது.
ஒப்பந்ததாரரை தேர்வு செய்து, இரண்டு ஆண்டுகளில் பணிகளை முடிக்க திட்டமிட்டப்பட்டுள்ளது. இரண்டாம் கட்டமாக, கூடுவாஞ்சேரி- தாம்பரம் வரையிலான 8.7 கி.மீ. தொலைவு பாதை அமைக்கும் பணிகள் மேற்கொள்ளளப்பட உள்ளன.
இத்திட்டத்தின் மொத்தச்செலவு ரூ.713.56 கோடியாக மதிப்பிடப்பட்டுள்ளது. கட்டுமானப்பணிகள் நிறைவடையும் போது, இந்தச்செலவு ரூ.756 கோடியாக உயரும் என எதிர்பார்க்கப்படுகிறது.
மணிக்கு 130 கி.மீ. வரையிலான வேகத்தில் ரயில்கள் செல்லும் வகையில் இந்த ரயில் பாதை அமைக்கப்படும். தாம்பரம் – செங்கல்பட்டு இடையே 4-வது பாதை பணிகள் முடிந்து, பயன்பாட்டுக்கு வரும்போது, 25 சதவீதம் கூடுதல் ரயில்களை இயக்க முடியும். இவ்வாறு அவர்கள் கூறினர்.