புதுடெல்லி: ஜப்பானில் சமீபத்தில் முடிவடைந்த 20-வது ஆசிய விளையாட்டு போட்டியில் இந்தியா 21 தங்கம், 27 வெள்ளி, 37 வெண்கலம் என மொத்தம் 85 பதக்கங்களை வென்று பட்டியலில் 4-வது இடத்தை பிடித்திருந்தது.
இந்நிலையில் ஆசிய விளையாட்டுப் போட்டிகளில் பதக்கம் வென்ற இந்திய வீரர், வீராங்கனைகளைப் பிரதமர் நரேந்திர மோடி நேற்று சந்தித்துப் பேசினார். டெல்லியில் உள்ள மேஜர் தயான் சந்த் விளையாட்டரங்கில் நடைபெற்ற சந்திப்பில், ஆசிய விளையாட்டு போட்டியில் தங்கப் பதக்கம் வென்ற ஆடவர் மற்றும் மகளிர் கிரிக்கெட் அணியினரும் பங்கேற்றனர்.
இந்த சந்திப்பின்போது, வீரர்கள் கையொப்பமிட்ட ஜெர்சிகள் உள்ளிட்ட நினைவுப் பரிசுகள் பிரதமர் மோடிக்கு வழங்கப்பட்டன. மேலும், வில்வித்தையில் அசத்திவரும் 17 வயதான கும்கும் மோஹோட், தான் பயன்படுத்தும் வில்லையும் பிரதமருக்கு நினைவுப் பரிசாக வழங்கினார். சர்வதேச கிரிக்கெட் கவுன்சில் (ஐசிசி) தலைவர் ஜெய் ஷா, இந்திய ஒலிம்பிக் சங்க தலைவர் பி.டி.உஷா உள்ளிட்ட பல்வேறு விளையாட்டு அமைப்புகளின் உயர் அதிகாரிகளும் நிகழ்ச்சியில் பங்கேற்றனர். நிகழ்ச்சியில் பிரதமர் நரேந்திர மோடி பேசியதாவது:
140 கோடி இந்தியர்களும் பெருமை கொள்ளும் வகையில் நீங்கள் சாதனை படைத்துள்ளீர்கள். மூவர்ணக் கொடியை உலக அரங்கில் உயரப் பறக்கச் செய்வதே மிகப் பெரிய வெற்றியாகும். எனவே, உங்களது வெற்றி உங்களுக்கு மட்டுமே சொந்தமானதல்ல, கோடிக்கணக்கான இந்தியர்களுக்கும் சொந்தமானது. ஒட்டுமொத்த நாட்டின் சார்பில் உங்களுக்கு எனது வாழ்த்துகளைத் தெரிவித்துக் கொள்கிறேன்.
இந்தியாவுக்கு 38 பதக்கங்களைப் பெற்றுத் தந்த நமது வீராங்கனைகளுக்குச் சிறப்புப் பாராட்டுகளைத் தெரிவித்துக் கொள்கிறேன். நீங்கள், 11 தங்கப் பதக்கங்கள் வென்று கொடுத்துள்ளீர்கள். சர்வதேச விளையாட்டுப் போட்டிகளை நடத்துவதற்கான நம்பகமான மற்றும் சிறந்த விருந்தோம்பல் அளிக்கும் நாடாக இந்தியா உருவெடுத்து வருகிறது. 2036-ம் ஆண்டு ஒலிம்பிக் போட்டிகளை நடத்துவதற்கு இந்தியா விண்ணப்பித்துள்ளது. அந்தப் போட்டியை இந்தியாவில் நடத்த வேண்டும் என்பதில் நாங்கள் உறுதியாக இருக்கிறோம்.
44 ஆண்டுகால காத்திருப்புக்குப் பிறகு மகளிர் ஹாக்கி அணி தங்கப் பதக்கம் வென்றிருப்பது மிகவும் பாராட்டத்தக்கது. கனவுகளை ஒரே நாளில் அடைந்துவிட முடியாது. அதற்குப் பல ஆண்டுகள் கடின உழைப்பும் அர்ப்பணிப்பும் தேவை. கடந்த 12 ஆண்டுகளில், இந்தியா பொறுமையுடன் செயல்பட்டு, விளையாட்டுத் துறைக்கான கட்டமைப்பை உருவாக்க கடுமையாக உழைத்துள்ளது.
ஒரு காலத்தில், சர்வதேச அளவிலான பெரிய விளையாட்டுப் போட்டிகளில் இந்தியா வெகு சில பதக்கங்களையே வெல்லும். நாட்டில் இத்தனை வகையான விளையாட்டுகள் இருப்பதுகூட பலருக்குத் தெரியாது.
இந்த எதிர்மறையான மனநிலையை மாற்ற வேண்டும் என்று நாங்கள் உறுதியேற்றோம். அதன் விளைவாக, உலகளாவிய விளையாட்டு அரங்கில் இந்தியாவின் பங்கேற்பு அதிகரித்து வருகிறது. தற்போது விளையாட்டுத் துறையில் வெளிப்படையான நடைமுறை அமல்படுத்தப்பட்டுள்ளது. இவ்வாறு பிரதமர் நரேந்திர மோடி பேசினார்.
Amazon.in: ஆன்லைன் ஷாப்பிங் - இலவச ஷிப்பிங் வசதி.