இந்திய வீரர் ஆஷிஷ் யாதவ்
யூஜின்: அமெரிக்காவின் யூஜின் நகரில் யு-20 தடகள சாம்பியன்ஷிப் நடைபெற்று வருகிறது. இதில் ஆடவருக்கான ஈட்டி எறிதல் தகுதி சுற்றில் ‘ஏ’ பிரிவில் இடம் பெற்றிருந்த இந்தியாவின் ஆஷிஷ் யாதவ் 69.87 மீட்டர் தூரம் எறிந்து 2-வது இடம் பிடித்து இறுதிப் போட்டிக்கு முன்னேறினார்.
மற்றொரு இந்திய வீரரான தரணிதரன் ‘பி’ பிரிவில் 68.07 மீட்டர் தூரம் எறிந்து ஒட்டுமொத்தமாக 12-வது இடம் பிடித்து இறுதி போட்டிக்குள் நுழைந்தார். தரணிதரன் தமிழகத்தைச் சேர்ந்தவர்.
மகளிருக்கான வட்டு எறிதல் தகுதி சுற்றில் ‘ஏ’ பிரிவில் இடம் பெற்றிருந்த இந்தியாவின் அமானத் கம்போஜ் 52.58 மீட்டர் தூரம் எறிந்து ஒட்டுமொத்தமாக 12-வது இடம் பிடித்து இறுதிப் போட்டிக்கு தகுதி பெற்றார்.
ஆடவருக்கான 800 மீட்டர் ஓட்டம் தகுதி சுற்றில் இந்தியாவின் மொகலி வெங்கட்ராம் பந்தய தூரத்தை 1:52.81 விநாடிகளில் கடந்து ஹீட் 5-ல் 3-வது இடம் பிடித்து அரை இறுதிக்கு முன்னேறினார்.
மற்றொரு இந்திய வீரரான யுவின் ஆனந்த், ஹீட் 1-ல் 7-வது இடமும், ஒட்டுமொத்தமாக 30-வது இடமும் பிடித்து ஏமாற்றம் அளித்தார். தமிழகத்தை சேர்ந்த அவர், பந்தய தூரத்தை 1:52.37 வினாடிகளில் கடந்திருந்தார்.
4×400 மீட்டர் கலப்பு தொடர் ஒட்டத்தில் பியூஷ் ராஜ், தஹ்ரா கதுன், சையத் சபீர், தியா ஆறுமுகம் ஆகியோரை உள்ளடக்கிய இந்திய அணி பந்தய தூரத்தை 3 நிமிடங்கள் 22.85 வினாடிகளில் கடந்து ஒட்டுமொத்தமாக 11-வது இடத்தை பிடித்து போட்டியில் இருந்து வெளியேறியது.