ஆக்லாந்து: இந்தியா - நியூஸிலாந்து அணிகள் இடையிலான 4-வது டி20 கிரிக்கெட் போட்டி ஆக்லாந்தில் இன்று பகல் 12.30 மணிக்கு நடைபெறுகிறது.
இரு அணிகள் இடையிலான 5 ஆட்டங்கள் கொண்ட டி 20 தொடரில் முதல் 3 ஆட்டங்களிலும் வெற்றி பெற்ற ஸ்ரேயஸ் ஐயர் தலைமையிலான இந்திய அணி தொடரை தன்வசப்படுத்தியது. இந்நிலையில் இரு அணிகளும் இன்று 4-வது போட்டியில் ஆக்லாந்தில் உள்ள ஈடன் பார்க் மைதானத்தில் மோதுகின்றன.
இந்திய அணி தொடரை வென்றுவிட்டதால் எந்தவித நெருக்கடியும் இல்லாமல் களமிறங்குகிறது. அதேவேளையில் சொந்த மண்ணில் நியூஸிலாந்து அணி ஆறுதல் வெற்றியை பெற வேண்டிய நெருக்கடிக்கு தள்ளப்பட்டுள்ளது. இந்திய அணியில் ஒரு சில மாற்றங்கள் இருக்க வாய்ப்பு உள்ளது. குல்தீப் யாதவ், வருண் சக்ரவர்த்தி ஆகியோர் விளையாடும் லெவனில் இடம் பெறக்கூடும்.
இது நிகழ்ந்தால் அக்சர் படேல், நமன் திர் அல்லது பிரின்ஸ் யாதவுக்கு ஓய்வு கொடுக்கப்படக்கூடும். கடந்த ஆட்டத்தில் புவனேஷ்வர் குமார் இறுதிக்கட்ட ஓவர்களில் சிறப்பாக செயல்பட்டு கவனம் ஈர்த்தார். ரிதத்துக்கு திரும்பி உள்ள அவர், நியூஸிலாந்து அணியின் பேட்டிங் வரிசைக்கு அழுத்தம் கொடுக்க முயற்சிக்கக்கூடும்.
கடந்த ஆட்டத்தில் சதம் விளாசி அசத்திய அபிஷேக் சர்மாவிடம் இருந்து மேலும் ஒரு சிறந்த மட்டை வீச்சு வெளிப்படக்கூடும்.
கடந்த இரு ஆட்டங்களில் காயம் காரணமாக களமிறங்காத இஷான் கிஷன் இன்றைய ஆட்டத்தில் களமிறங்குவது நேற்று வரை உறுதி செய்யப்படாமல் இருந்தது. ஒருவேளை அவர், களமிறங்காத பட்சத்தில் வைபவ் சூர்யவன்ஷிக்கு தொடர்ந்து வாய்ப்பு வழங்கப்படும். அதேவேளையில் நிதிஷ் குமார் ரெட்டிக்கு பதிலாக ஷிவம் துபே களமிறக்கப்பட வாய்ப்பு உள்ளது.