புதுடெல்லி: இந்திய மகளிர் ஹாக்கி அணியின் தலைமைப் பயிற்சியாளராக ஜோயர்ட் மரைன் நியமனம் செய்யப்பட்டுள்ளார்.
இதுதொர்பான அறிவிப்பை ஹாக்கி இந்தியா அமைப்பு நேற்று வெளியிட்டுள்ளது. நெதர்லாந்தைச் சேர்ந்த ஜோயர்ட் மரைன் உடனடியாக இந்திய மகளிர் அணியினருடன் இணைந்து கொள்வார் என்று தெரியவந்துள்ளது. ஜோயர்ட் மரைனுக்கு உதவியாக, அனலிட்டிக்கல் பயிற்சியாளராக மத்தியாஸ் விலா இருப்பார். இவர் அர்ஜெண்டினாவைச் சேர்ந்தவர்.
இதுகுறித்து ஹாக்கி இந்தியா அமைப்பின் தலைவர் திலீப் டிர்க்கி கூறும்போது, “இந்திய மகளிர் ஹாக்கி அணியின் தலைமைப் பயிற்சியாளராக ஜோயர்ட் மரைனை வரவேற்கிறோம். அவரின் தலைமையில் இந்திய மகளிர் அணியினரின் பயிற்சியும், விளையாட்டும் மேம்படும் என நம்புகிறோம்” என்றார்.
ஜோயர்ட் மரைன் கூறும்போது, “நான்கரை ஆண்டுகளுக்குப் பிறகு மீண்டும் இந்தியாவுக்குத் திரும்பியிருப்பது மகிழ்ச்சி அளிக்கிறது. புதிய ஆற்றலுடனும் தெளிவான பார்வையுடனும் நான் திரும்பி வந்துள்ளேன். அணியின் வளர்ச்சிக்கு ஆதரவளிக்கவும், உலக அரங்கில் வீரர்கள் தங்கள் முழுத் திறனையும் வெளிப்படுத்த உதவவும் நான் முயல்வேன்” என்றார்.