பாரிஸ்: ரியல் மாட்ரிட் கால் பந்து கிளப் அணியின் நட்சத்திர வீரர் கிளியான் மாப்பே இடது முழங்காலில் காயம் அடைந்துள்ளார்.
பிரான்ஸ் நாட்டு அணியின் கால்பந்து ஜாம்பவான்களில் ஒருவர் கிளியான் மாப்பே. தற்போது பிரான்ஸ் தேசிய அணிக்காகவும், ரியல் மாட்ரிட் கிளப் அணிக்காகவும் விளையாடி வருகிறார்.
இந்நிலையில், கிளியான் மாப்பேவுக்கு ஏற்பட்டுள்ள காயம் தொடர்பாக ஸ்பெயின் நாட்டைச் சேர்ந்த ரியல் மாட்ரிட் கால்பந்து கிளப் அணி நிர்வாகம் வெளியிட்டுள்ள செய்திக்குறிப்பில் கூறியுள்ளதாவது: இடது காலில் ஏற்பட்ட சுளுக்கு காரணமாக கிளியான் மாப்பேவுக்கு பரிசோதனை நடைபெற்றது.
அப்போது அவரது இடது முழுங்காலில் காயம் ஏற்பட்டுள்ளது தெரியவந்தது. இதையடுத்து அவருக்கு மருத்துவர்கள் சிகிச்சை அளித்து வருகின்றனர். அவர் அடுத்த 3 வாரங்களுக்கு தொடர்ந்து ஓய்வில் இருப்பார். இவ்வாறு அதில் கூறப்பட்டுள்ளது.
கடந்த 2025-ம் ஆண்டில் நடைபெற்ற பல்வேறு போட்டிகளில் கிளியான் மாப்பே, ரியல் மாட்ரிட் அணிக்காக சிறப்பாக விளையாடியிருந்தார். 2025-ல் ரியல் மாட்ரிட் அணிக்காக 59 கோல்களை அவர் அடித்திருந்தார் என்பது குறிப்பிடத்தக்கது.
இதற்கு முன்பு பாரிஸ் செயின்ட்-ஜெர்மைன்(பிஎஸ்ஜி) அணிக்காக விளையாடி வந்த கிளியான் மாப்பே கடந்த 2024-ம் ஆண்டு ரியல் மாட்ரிட் அணியில் இணைந்தார் என்பது நினைவிருக்கலாம்.