ஜெனிகா: பிபா உலகக் கோப்பை கால்பந்து தொடர் வரும் ஜூன் 11 முதல் ஜூலை 19 வரை கனடா, அமெரிக்கா, மெக்சிக்கோவில் நடைபெற உள்ளது. இந்நிலையில் இந்த தொடருக்கான ஐரோப்பிய தகுதி சுற்றின் பிளே ஆஃப் ஆட்டங்கள் நேற்று நடைபெற்றன.
இதில் போஸ்னியாவில் உள்ள ஜெனிகா நகரில் நடைபெற்ற ஆட்டத்தில் 4 முறை சாம்பியனான இத்தாலி, தரவரிசையில் 66-வது இடத்தில் உள்ள போஸ்னியா மற்றும் ஹெர்சகோவினா அணியுடன் பலப்பரீட்சை நடத்தியது. 15-வது நிமிடத்தில் இத்தாலி அணியின் மொயீஸ் கீன் கோல் அடித்து அசத்தினார். இதனால் அந்த அணி 1-0 என முன்னிலை பெற்றது. 41-வது நிமிடத்தில் இத்தாலி வீரர் அலெஸாண்ட்ரோ பாஸ்டோனிக்கு ரெட் கார்டு வழங்கப்பட்டது.
இதனால் இத்தாலி அணி 10 வீரர்களுடன் விளையாடும் நிலைக்கு தள்ளப்பட்டது. 79-வது நிமிடத்தில் போஸ்னியா பதிலடி கொடுத்தது. அந்த அணியின் வீரர் ஹாரிஸ் தபகோவிச் கோல் அடிக்க ஆட்டம் 1-1 என சமநிலையை எட்டியது. நிர்ணயிக்கப்பட்ட 90 நிமிடங்களின் முடிவில் ஆட்டம் 1-1 என சமநிலையில் இருந்தது. இதையடுத்து கூடுதலாக 30 நிமிடங்கள் வழங்கப்பட்டது. இதில் இரு அணிகள் தரப்பில் மேற்கொண்டு கோல் அடிக்கப்படவில்லை. இதனால் வெற்றியை தீர்மானிக்க பெனால்டி ஷுட் அவுட் முறை கடைபிடிக்கப்பட்டது.
இதில் போஸ்னியா மற்றும் ஹெர்சகோவினா அணி 4-1 என்ற கோல் கணக்கில் வெற்றி பெற்று உலகக் கோப்பை கால்பந்து தொடருக்கு தகுதி பெற்றது. அந்த அணி உலகக் கோப்பை கால்பந்து தொடருக்கு தகுதி பெறுவது இது 2-வது முறையாகும். கடைசியாக அந்த கடந்த 2014-ம் முதன்முறையாக உலகக் கோப்பை கால்பந்து தொடரில் விளையாடி இருந்தது.
அதேவேளையில் இத்தாலி அணி தொடர்ச்சியாக 3-வது முறையாக உலகக் கோப்பை தொடருக்கு தகுதி பெற முடியாமல் வெளியேறி உள்ளது. அந்த அணி 2018 மற்றும் 2022-ம் ஆண்டு நடைபெற்ற உலகக் கோப்பை தொடருக்கும் தகுதி பெற இல்லை. 1934, 1934, 1982 மற்றும் 2006-ம் ஆண்டுகளில் சாம்பியன் பட்டம் வென்ற இத்தாலி அணி தற்போதைய தோல்வியால் கால்பந்தின் மிகப்பெரிய திருவிழாவில் 16 ஆண்டுகளாக நுழைய முடியாமல் தவிப்பு நிலைக்கு தள்ளப்பட்டுள்ளது.
மற்ற ஆட்டங்களில் சுவீடன் 3-2 என்ற கோல் கணக்கில் போலந்து அணியையும், துருக்கி 1-0 என்ற கோல் கணக்கில் கோசோவோ அணியையும் தோற்கடித்து உலகக் கோப்பை தொடருக்கு தகுதி பெற்றன.துருக்கி அணி 2002-ம் ஆண்டுக்கு பிறகு தற்போதுதான் உலகக் கோப்பை தொடருக்கு தகுதி பெறுகிறது. செக் குடியரசு - டென்மார்க் அணிகள் மோதிய ஆட்டம் நிர்ணயிக்கப்பட்ட 90 நிமிடங்கள் 1-1 சமனில் முடிந்தது.
இதன் பின்னர் வழங்கப்பட்ட 30 நிமிடங்கள் கூடுதல் நேரத்தில் இரு அணிகளும் தலா ஒரு கோல் அடித்தன. இதைத் தொடர்ந்து நடத்தப்பட்ட பெனால்டி ஷுட் அவுட்டில் செக்குடியரசு 3-1 என்ற கோல் கணக்கில் வெற்றி பெற்று உலகக் கோப்பை கால்பந்து தொடரில் கால்பதித்தது. அந்த அணி 2006-ம் ஆண்டுக்கு தற்போதுதான் உலகக் கோப்பை தொடரில் நுழைகிறது. 40 வருடங்களுக்கு பிறகு இராக் உலகக் கோப்பை கால்பந்து தகுதி சுற்றில் கண்டங்களுக்கு இடையிலான பிளே ஆஃப் போட்டியில் நேற்று மெக்சிகோவில் நடைபெற்ற ஆட்டத்தில் இராக் - பொலிவியா அணிகள் மோதின.
இதில் இராக் அணி 2-1 என்ற கோல் கணக்கில் வெற்றி பெற்றது. அந்த அணி சார்பில் 10-வது நிமிடத்தில் அலி அல்-ஹமாதியும், 53-வது நிமிடத்தில் அய்மன் ஹுசைனும் கோல் அடித்து அசத்தினர். இந்த வெற்றியின் மூலம் கடைசி அணியாக இராக் உலகக் கோப்பை தொடருக்கு தகுதி பெற்றது. 40 வருடங்களுக்கு பிறகு இராக் அணி உலகக் கோப்பை கால்பந்து தொடரில் கால்பதிக்கிறது. கடைசியாக அந்த 1986-ம் ஆண்டு மெக்சிகோவில் நடைபெற்ற உலகக் கோப்பை தொடரில் விளையாடி இருந்தது.
அமெரிக்கா-இஸ்ரேல் மற்றும் ஈரான் இடையேயான போரினால் ஏற்பட்ட போக்குவரத்துத் தடங்கல் காரணமாக, இராக் அணியின் பெரும்பாலான வீரர்கள் பாக்தாத்திலிருந்து ஜோர்டானுக்கு பேருந்தில் பயணித்து அங்கிருந்து மெக்சிகோவை அடைய 3 நாட்கள் ஆனது. இக்கட்டான நிலையிலும் இராக் வீரர்கள் காட்டிய உறுதி, உலக கால்பந்து ரசிகர்களிடையே பெரிய வரவேற்பைப் பெற்றுள்ளது இராக் அணி உலகக் கோப்பை தொடரில் ‘ஐ’ பிரிவில் சேர்க்கப்பட்டுள்ளது. இதே பிரிவில் பிரான்ஸ், செனகல், நார்வே அணிகளும் இடம் பெற்றுள்ளன.
காங்கோ அசத்தல் மெக்சிகோவில் உள்ள குவாடலஜாரா நகரில் நடைபெற்ற கண்டங்களுக்கு இடையிலான பிளே ஆஃப் ஆட்டத்தில் காங்கோ - ஜமைக்கா அணிகள் மோதின. இதில் காங்கோ 1-0 என்ற கோல் கணக்கில் வெற்றி பெற்று உலகக் கோப்பை தொடருக்கு தகுதி பெற்றது. அந்த அணி தரப்பில் கூடுதல் நேரத்தின் 100-வது நிமிடத்தில் ஆக்சல் டுவான்செபே கோல் அடித்து அசத்தினார்.