புதுடெல்லி: சமோவாவின் அபியாவில் காமன்வெல்த் இளைஞர், ஜூனியர் பளுதூக்குதல் சாம்பியன்ஷிப் மற்றும் அதற்கு இணையான யுனிவர்சல் கோப்பை (சீனியர்) போட்டி நடைபெற்று வருகிறது. இதன் 2-வது நாளில் இந்தியா 4 தங்கப் பதக்கங்களைக் கைப்பற்றி அசத்தியுள்ளது.
ஆடவருக்கான 65 கிலோ எடைப்பிரிவில் சுனில் சிங் மொத்தம் 271 கிலோ (ஸ்னாட்ச் 126 + கிளீன் அண்ட் ஜெர்க் 145) எடையைத் தூக்கி தங்கப் பதக்கத்தை வென்றார். மகளிருக்கான 58 கிலோ எடைப்பிரிவில் ஐசாங்பா கோகோய் 185 கிலோ (ஸ்னாட்ச் 79 + கிளீன் அண்ட் ஜெர்க் 106) எடையை தூக்கி தங்கம் வென்றார்.
ஆடவருக்கான 71 கிலோ எடைப்பிரிவில் அபினோப் கோகோய் 284 கிலோ (ஸ்னாட்ச் 129 + கிளீன் அண்ட் ஜெர்க் 155) எடையை தூக்கி தங்கப் பதக்கத்தைக் கைப்பற்றினார். யுனிவர்சல் கோப்பையில் ஆடவருக்கான 65 கிலோ எடைப்பிரிவில் அருணாச்சலப் பிரதேசத்தைச் சேர்ந்த சாரு 289 கிலோ (ஸ்னாட்ச் 127 + கிளீன் அண்ட் ஜெர்க் 162) எடையைத் தூக்கி தங்கம் வென்றார்.