துபாய்: ஐசிசி டெஸ்ட் கிரிக்கெட் வீரர்கள் தரவரிசையில் இங்கிலாந்து வீரர் ஹாரி புரூக் 2-ம் இடத்துக்கு முன்னேறியுள்ளார்.
இங்கிலாந்து, ஆஸ்திரேலிய அணிகளுக்கு இடையிலான 5-வது டெஸ்ட் போட்டி முடிவடைந்துள்ள நிலையில் தரவரிசைப் பட்டியலை சர்வதேச கிரிக்கெட் கவுன்சில்(ஐசிசி) நேற்று வெளியிட்டது. இதில் இங்கிலாந்து வீரர் ஹாரி புரூக் 846 புள்ளிகளுடன் 2-ம் இடத்துக்கு முன்னேறியுள்ளார்.
முதலிடத்தில் இங்கிலாந்து வீரர் ஜோ ரூட் 867 புள்ளிகளுடன் தொடர்ந்து முதலிடத்தில் நீடிக்கிறார். 3-ம் இடத்தில் நியூஸிலாந்து வீரர் கேன் வில்லியம்ஸனும்(822 புள்ளிகள்), 4-வது இடத்தில் ஆஸ்திரேலிய வீரர் டிராவிஸ் ஹெட்டும் (816 புள்ளிகள்), 5-வது இடத்தில் ஆஸ்திரேலிய வீரர் ஸ்டீவன் ஸ்மித்தும் (811 புள்ளிகள்) உள்ளனர். 10-ம் இடத்தில் இந்திய அணியின் கேப்டன் ஷுப்மன் கில் (730 புள்ளிகள்) உள்ளார்.
அதே நேரத்தில் பந்து வீச்சாளர்கள் தரவரிசையில், இந்திய வீரர் ஜஸ்பிரீத் பும்ரா 879 புள்ளிகளுடன் தொடர்ந்து முதலிடத்தில் இருக்கிறார். 2-ம் இடத்தில் ஆஸ்திரேலிய வீரர் மிட்செல் ஸ்டார்க்கும், 3-ம் இடத்தில் பாகிஸ்தான் வீரர் நோமன் அலியும், 4-ம் இடத்தில் பாட் கம்மின்ஸும், 5-ம் இடத்தில் மேட் ஹென்றியும் உள்ளனர்.
பந்து வீச்சாளர்கள் தரவரிசையில் இந்திய வீரர்கள் முகமது சிராஜ் 12-வது இடத்திலும், ரவீந்திர ஜடேஜா 13-ம் இடத்திலும் உள்ளனர்.