அடிலெய்டு: அடிலெய்டில் நடைபெற்று வரும் இந்த டெஸ்ட் போட்டியில் ஆஸ்திரேலிய அணி முதல் இன்னிங்ஸில் 371 ரன்கள் குவித்தது. அதிகபட்சமாக அலெக்ஸ் கேரி 109, உஸ்மான் கவாஜா 82, மிட்செல் ஸ்டார்க் 54 ரன்கள் சேர்த்தனர். இங்கிலாந்து அணி தரப்பில் ஜோப்ரா ஆர்ச்சர் 5 விக்கெட்களை வீழ்த்தினார்.
இதையடுத்து பேட் செய்த இங்கிலாந்து அணி 2-வது நாள் ஆட்டத்தின் முடிவில் 68 ஓவர்களில் 8 விக்கெட்கள் இழப்புக்கு 213 ரன்கள் எடுத்தது. பென் ஸ்டோக்ஸ் 45 ரன்களும், ஜோப்ரா ஆர்ச்சர் 30 ரன்களும் சேர்த்து ஆட்டமிழக்காமல் இருந்தனர். நேற்று 3-வது நாள் ஆட்டத்தை இங்கிலாந்து அணி தொடர்ந்து விளையாடியது.
பென் ஸ்டோக்ஸ், ஜோப்ரா ஆர்ச்சர் ஜோடி போராடி ரன்கள் சேர்த்தது. சிறப்பாக விளையாடி வந்த பென் ஸ்டோக்ஸ் தனது 37-வது அரை சதத்தை கடந்தார். 9-வது விக்கெட்டுக்கு 106 ரன்கள் சேர்த்த இந்த ஜோடியை மிட்செல் ஸ்டார்க் பிரித்தார். பென் ஸ்டோக்ஸ் 198 பந்துகளில், 8 பவுண்டரிகளுடன் 83 ரன்கள் எடுத்த நிலையில் மிட்செல் ஸ்டார்க் பந்தில் போல்டானார்.
தனது முதல் அரை சதத்தை விளாசிய ஜோப்ரா ஆர்ச்சர் 105 பந்துகளில், ஒரு சிக்ஸர், 5 பவுண்டரிகளுடன் 51 ரன்கள் எடுத்த நிலையில ஸ்காட் போலண்ட் பந்தில் ஆட்டமிழந்தார். முடிவில் இங்கிலாந்து அணி 87.2 ஓவர்களில் 286 ரன்களுக்கு ஆட்டமிழந்தது. ஜோஷ் டங் 7 ரன்களுடன் ஆட்டமிழக்காமல் இருந்தார்.
ஆஸ்திரேலிய அணி தரப்பில் பாட் கம்மின்ஸ், ஸ்காட் போலண்ட் ஆகியோர் தலா 3 விக்கெட்களை வீழ்த்தினர். நேதன் 2 விக்கெட்களையும், மிட்செல் ஸ்டார்க், கேமரூன் கிரீன் ஆகியோர் தலா ஒரு விக்கெட்டையும் கைப்பற்றினர். 85 ரன்கள் முன்னிலையுடன் 2-வது இன்னிங்ஸை விளையாடிய ஆஸ்திரேலிய அணி 3-வது நாள் ஆட்டத்தின் முடிவில் 66 ஓவர்களில் 4 விக்கெட்கள் இழப்புக்கு 271 ரன்கள் எடுத்தது.
அதிரடியாக விளையாடிய தொடக்க வீரரான டிராவிஸ் ஹெட் தனது 11-வது சதத்தை விளாசினார். மட்டையை சுழற்றிய அவர், 196 பந்துகளில், 2 சிக்ஸர்கள், 13 பவுண்டரிகளுடன் 142 ரன்கள் விளாசி ஆட்டமிழக்காமல் களத்தில் இருந்தார். அவருக்கு உறுதுணையாக விளையாடிய அலெக்ஸ் கேரி 91 பந்துகளில், 4 பவுண்டரிகளுடன் 52 ரன்கள் சேர்த்து களத்தில் இருந்தார். இந்த ஜோடி 5-வது விக்கெட்டுக்கு 122 ரன்கள் சேர்த்துள்ளது.
முன்னதாக ஜேக் வெதரால்டு 1, மார்னஷ் லபுஷேன் 13, உஸ்மான் கவாஜா 40, கேமரூன் கிரீன் 7 ரன்களில் ஆட்டமிழந்தனர். இங்கிலாந்து அணி சார்பில் ஜோஷ் டங் 2 விக்கெட்களை வீழ்த்தினார். பிரைடன் கார்ஸ், வில் ஜேக்ஸ் ஆகியோர் தலா ஒரு விக்கெட் கைப்பற்றினர். 356 ரன்கள் முன்னிலை பெற்றுள்ள ஆஸ்திரேலிய அணி கைவசம் 6 விக்கெட்கள் மீதம் உள்ள நிலையில் இன்று 4-வது நாள் ஆட்டத்தை தொடர்ந்தது.
ஹெட் 170, கேரி 72 ரன்கள் எடுத்த நிலையில் ஆட்டமிழந்தனர். பின்னர் இங்கிலிஸ், கம்மின்ஸ், லயன், போலண்ட் ஆகியோர் அடுத்தடுத்து வெளியேறினர். ஆஸ்திரேலிய அணி இரண்டாவது இன்னிங்ஸில் 349 ரன்களுக்கு ஆட்டமிழந்தது.
இதையடுத்து 435 ரன்கள் எடுத்தால் வெற்றி என்ற இலக்கை இங்கிலாந்து அணி விரட்டி வருகிறது. அந்த அணி 2-வது இன்னிங்ஸில் 15 ஓவர்களில் 2 விக்கெட் இழப்புக்கு 51 ரன்கள் எடுத்துள்ளது. டக்கெட் மற்றும் போப் ஆட்டமிழந்தனர்.
99 ரன்னில் தப்பித்த ஹெட்: டிராவிஸ் ஹெட் 99 ரன்களில் இருந்த போது ஜோப்ரா ஆர்ச்சர் பந்தில் கொடுத்த கேட்ச்சை கல்லி திசையில் இருந்த ஹாரி புரூக் தவறவிட்டார். இந்த வாய்ப்பை டிராவிஸ் ஹெட் சரியாக பயன்படுத்திக் கொண்டார்.