பிரிஸ்பன்: ஆஷஸ் டெஸ்ட் கிரிக்கெட் தொடரின் 2-வது போட்டியில் ஆஸ்திரேலிய அணி முதல் இன்னிங்ஸில் 511 ரன்கள் குவித்தது. தொடர்ந்து விளையாடிய இங்கிலாந்து அணி 3-வது நாள் ஆட்டத்தின் முடிவில் 6 விக்கெட்கள் இழப்புக்கு 134 ரன்கள் எடுத்தது.
பிரிஸ்பனில் உள்ள காபா மைதானத்தில் நடைபெற்று வரும் இந்த டெஸ்டில் முதல் இன்னிங்ஸில் இங்கிலாந்து அணி 334 ரன்கள் எடுத்தது. அதிகபட்சமாக ஜோ ரூட் 138 ரன்கள் எடுத்தார். இதையடுத்து விளையாடிய ஆஸ்திரேலிய அணி 2-வது நாள் ஆட்டத்தின் முடிவில் 73 ஓவர்களில் 6 விக்கெட்கள் இழப்புக்கு 378 ரன்கள் குவித்தது.அலெக்ஸ் கேரி 46, மைக்கேல் நேசர் 15 ரன்களுடன் ஆட்டமிழக்காமல் களத்தில் இருந்தனர். நேற்று 3-வது நாள் ஆட்டத்தை ஆஸ்திரேலிய அணி தொடர்ந்து விளையாடியது. மைக்கேல் நேசர் 16 ரன்களில் பென் ஸ்டோக்ஸ் பந்தில் ஆட்டமிழந்தார்.
இதன் பின்னர் களமிறங்கிய மிட்செல் ஸ்டார்க் சீராக ரன்கள் சேர்த்து அசத்தினார். அலெக்ஸ் கேரி 69 பந்துகளில், 6 பவுண்டரிகளுடன் 63 ரன்கள் எடுத்த நிலையில் கஸ் அட்கின்சன் பந்தில் வெளியேறினார். தனது 12-வது அரை சதத்தை கடந்த மிட்செல் ஸ்டார்க் 141 பந்துகளில், 13 பவுண்டரிகளுடன் 77 ரன்கள் எடுத்த நிலையில் பிரைடன் கார்ஸ் பந்தில் அவுட் ஆனார்.
மிட்செல் ஸ்டார்க் சுமார் இரண்டரை மணி நேரம் களத்தில் பேட் செய்தார். 9-வது விக்கெட்டுக்கு ஸ்காட் போலண்ட், மிட்செல் ஸ்டார்க் ஜோடி 75 ரன்கள் சேர்த்தது. கடைசி வீரராக பிரண்டன் டாகெட் 13 ரன்னில் நடையை கட்ட ஆஸ்திரேலிய அணி 117.3 ஓவர்களில் 511 ரன்கள் குவித்து ஆட்டமிழந்தது. கடைசி 4 விக்கெட்களுக்கு ஆஸ்திரேலிய அணி 133 ரன்கள் சேர்த்தது.
ஸ்காட் போலண்ட் 21 ரன்களுடன் ஆட்டமிழக்காமல் இருந்தார். இங்கிலாந்து அணி தரப்பில் பிரைடன் கார்ஸ் 4, பென் ஸ்டோக்ஸ் 3 விக்கெட்கள் வீழ்த்தினர். ஜோப்ரா ஆர்ச்சர், கஸ் அட்கின்சன், வில் ஜேக்ஸ் ஆகியோர் தலா ஒரு விக்கெட் கைப்பற்றினர். ஆஸ்திரேலிய அணியில் அனைத்து வீரர்களும் இரட்டை இலக்க ரன்கள் எடுத்து ஆட்டமிழந்தனர். கிட்டத்தட்ட 150 ஆண்டுகால டெஸ்ட் கிரிக்கெட்டில் மூன்றாவது முறையாக, 11 ஆஸ்திரேலிய வீரர்களும் ஒரு டெஸ்ட் இன்னிங்ஸில் இரட்டை இலக்க ரன்களை எடுத்துள்ளனர்.
177 ரன்கள் பின்தங்கிய நிலையில் 2-வது இன்னிங்ஸை விளையாடிய இங்கிலாந்து அணி 3-வது நாள் ஆட்டத்தின் முடிவில் 35 ஓவர்களில் 6 விக்கெட்கள் இழப்புக்கு 134 ரன்கள் எடுத்தது. ஸாக் கிராலி 44, பென் டக்கெட் 15, ஆலி போப் 26, ஜோ ரூட் 15, ஹாரி புரூக் 15, ஜேமி ஸ்மித் 4 ரன்களில் நடையை கட்டினர். கேப்டன் பென் ஸ்டோக்ஸ் 4, வில் ஜேக்ஸ் 4 ரன்களுடன் களத்தில் இருந்தனர். ஆஸ்திரேலிய அணி தரப்பில் மிட்செல் ஸ்டார்க், ஸ்காட் போலண்ட், மைக்கேல் நேசர் ஆகியோர் தலா 2 விக்கெட்களை வீழ்த்தினர். கைவசம் 4 விக்கெட்கள் இருக்க 43 ரன்கள் பின்தங்கியுள்ள இங்கிலாந்து அணி இன்று 4-வது நாள் ஆட்டத்தை சந்திக்கிறது.