ஃபிஃபா உலகக் கோப்பை அரையிறுதி ஆட்டத்தில் இங்கிலாந்து அணியை 2-1 என்ற கோல் கணக்கில் அர்ஜெண்டினா வென்றாலும், மைதானத்தில் அந்த அணியின் வீரர்கள் ‘லாஸ் மால்வினாஸ்’ என்று எழுதப்பட்ட பேனரை தாங்கி கொண்டாட்டத்தில் ஈடுபட்டது சர்ச்சையை ஏற்படுத்தியுள்ளது.
அட்லாண்டாவில் உள்ள மெர்சடீஸ் பென்ஸ் மைதானத்தில் நடந்த அரையிறுதி ஆட்டத்தில் அர்ஜெண்டினா அணியின் மிட்ஃபீல்டர் ஜியோவானி லோ செல்சோ வெற்றி கோல் அடித்துவிட்டு கையில் ஒரு பேனரை வைத்து வெற்றியை கொண்டாடினார். அந்த பேனரில் ‘லாஸ் மால்வினாஸ் சன் அர்ஜெண்டினா’ என்று எழுதப்பட்டிருந்தது. அதாவது ஃபாக்லாண்ட் தீவு மீது தங்களுக்கு இன்னும் ஆதிக்கம், உரிமை இருக்கிறது என்பதை குறிக்கும் விதமாக அந்த பேனரில் எழுதப்பட்டிருந்தது.
பொதுவாக, உலகக் கோப்பை கால்பந்து போன்ற சர்வதேச போட்டிகளில் அரசியல் ரீதியான கருத்துகளை தாங்கி வீரர்கள் வர ஃபிஃபா தடை விதித்துள்ளது. அர்ஜெண்டினா அணியினர் செய்த இந்தச் செயலுக்காக அவர்கள் மீது ஒழுங்கு நடவடிக்கை எடுக்கப்படுமா என்பது விரைவில் தெரியவரும்.
அர்ஜெண்டினா வீரர்கள் தாங்கிப் பிடித்த பேனரில் எழுதப்பட்ட வாசகங்கள் எதைக் குறிக்கிறது, அதற்கு என்ன அர்த்தம் என்ன என்பதைப் பார்க்கலாம்.
‘லாஸ் மால்வினாஸ்’ என்றால் என்ன?
அர்ஜெண்டினா வீரர்கள் தாங்கிப் பிடித்த அந்த பேனரில் ‘லாஸ் மால்வினாஸ் சன் (son) அர்ஜெண்டினா’ என எழுதப்பட்டிருந்தது. இதற்கு அர்த்தம் ‘மால்வினாஸும் அர்ஜெண்டினா நாட்டவர்கள்தான்’ என்பதுதான். ஃபாக்லாந்து தீவுக்கு அர்ஜெண்டினா வைத்த பெயர்தான் லாஸ் மால்வினாஸ். அர்ஜெண்டினா நாட்டின் கிழக்குக் கடற்கரையில் ருந்து 480 கி.மீ தொலைவில் இந்த ஃபாக்லாந்து தீவு அமைந்துள்ளது.
இந்த ஃபாக்லாந்து தீவு தற்போது பிரிட்டன் ஆதிக்கத்தின் கீழ் இருக்கிறது. இந்த தீவுக்காக அர்ஜெண்டினாவும் பிரிட்டனுடன் போரிட்டு தோல்வி அடைந்தது. இருப்பினும், இந்த தீவுக்கு உரிமை கொண்டாடி தொடர்ந்து அந்நாட்டு பேசிவந்த நிலையில், உலகக் கோப்பைத் தொடரில் முதன்முதலாக ஃபாக்லாந்து தீவுக்கு சொந்தம் கொண்டாடி குரல் ஒலித்துள்ளது.
மால்வினாஸ் பேனரின் முக்கியத்துவம் என்ன?
பிரிட்டனுக்கும், அர்ஜெண்டினாவுக்கும் இடையே 190 ஆண்டுகளாக ஃபாக்லாந்து தீவு மீது உரிமை கொண்டாடுவதில் பிரச்சினை நீடித்து வருகிறது. 19-ம் நூற்றாண்டின் தொடக்கத்தில் நெப்போலியன் போரின் இருந்து இரு நாடுகளுக்கும் இடையே இந்த விவகாரம் தொடங்கியது.
1774-ம் ஆண்டு இந்த ஃபாக்லாந்து தீவை பிரிட்டன் கண்டுபிடித்தது. இந்தத் தீவுக் கூட்டம் பிரிட்டன் மக்கள் கண்டுபிடித்தபோது அங்கு மக்கள் யாரும் வசிக்கவில்லை என்பதால், பிரிட்டனைச் சேர்ந்தவர்கள் அங்கு குடியேறினர். இதையடுத்து, 1833-ம் ஆண்டிலிருந்து தெற்கு அட்லாண்டிக் பெருங்கடல் என்பது பிரிட்டிஷ் அரசின் ஆதிக்கத்தின் கீழ் வந்தது. ஆனால், நீண்ட காலமாக அத்தீவுகளின் மீது தமக்கே இறையாண்மை உரிமை இருக்கிறது என்று அர்ஜெண்டினாவை வாதாடுகிறது.
1982-ம் ஆண்டு அர்ஜெண்டினாவில் ராணுவ ஆட்சி நடந்தது. அப்போது ராணுவ ஆட்சியில் திடீரென ஃபாக்லாந்து தீவை உரிமை கொண்டாடி தீவுக்குள் படையெடுத்தனர். ஆனால், பிரிட்டன் படையினர் கடுமையான தாக்குதலை அர்ஜெண்டினா ராணுவத்தினர் எதிர்பார்க்கவில்லை.
அட்லாண்டிக் பெருங்கடல் பகுதியில் இரு நாட்டு ராணுவத்தினருக்கும் ஏற்ககுறைய 74 நாட்கள் நடந்த போரின் இறுதியில் அர்ஜெண்டினா தோல்வி அடைந்தது. இதுதான் ஃபாக்லாந்து போர் என்று அழைக்கப்படுகிறது. இந்தப் போரில் பிரிட்டன் தரப்பில் 255 வீரர்கள், அர்ஜெண்டினா தரப்பில் 650 வீரர்கள், ஃபாக்லாந்து பூர்விகக் குடிகள் 3 பேர் உயிரிழந்தனர்.
இன்று வரை ஃபாக்லாந்து தீவுக்கு பிரிட்டன் அரசு உரிமை கோரி வருகிறது. அங்கு ராணுவத்தையும் நிறுத்தியுள்ளது. ஆனால், அர்ஜெண்டினா தொடர்ந்து சர்வதேச சமூகத்தினர் வாயிலாகவும், ராஜாங்க ரீதியாகவும், ஐக்கிய நாடுகள் மூலமும் அந்தத் தீவுக்கு உரிமை கோரி பேச்சு நடத்தி வருகிறது.
பழிவாங்கிய ‘கடவுளின் கை’
இந்த ஃபாக்லாந்து போர் காரணமாகவே கால்பந்து உலகில் அர்ஜெண்டினாவும், இங்கிலாந்தும் கடும் வைரியாகவே 1962 முதல் இருந்து வருகின்றன. இது 1986-ம் ஆண்டில் இரு நாட்டு அணிகளுக்கும் இடையிலான மோதல் உச்சத்தை அடைந்தது.
1986-ம் ஆண்டு ஃபிஃபா உலகக் கோப்பையின்போது, இங்கிலாந்துக்கு எதிரான காலிறுதி ஆட்டத்தில் அர்ஜெண்டினா சூப்பர் ஸ்டார் வீரர் மாரடோனா அடித்த ‘கடவுளின் கை கோல்’, ‘நூற்றாண்டின் கோல்’ ஆகியவை வெற்றியைத் தேடித் தந்தது. மாரடோனா அடித்த முதல் கோல் கால்பந்து வரலாற்றில் ‘கடவுள் கை’ என்று அழைக்கப்படுகிறது. அந்த கோலை மாரடோனா தனது இடதுகையால் அடித்தார் என்பதை எந்த நடுவர்களும் பார்க்கவில்லை. இந்த கோல் குறித்து மாரடோனா கூறுகையில் “சிறிய பங்கு என் தலைக்கும், மற்றவை கடவுளின் கரங்கள்” என்றார்.
அந்த உலகக் கோப்பை முடிந்து நீண்ட காலத்துக்குப் பின், சட்டவிரோதமாக பந்தை கையால் தட்டி கோல் அடித்ததை மாரடோனா ஒப்புக்கொண்டார். அதற்கு ஃபாக்லாந்து போரில் அர்ஜெண்டினாவை தோற்கடித்த பிரிட்டினை பழிதீர்க்க அர்ஜெண்டினா இந்த கோலை ஆயுதமாக்கியது என்று அவர் தெரிவித்திருந்தார்.
நடவடிக்கை பாயுமா?
சர்வதேச கால்பந்து கூட்டமைப்பு வாரியம் (ஐஎப்ஏபி) மற்றும் ஃபிஃபா ஆகியவை போட்டியின் அரசியல் ரீதியான முழக்கங்கள், அடையாளங்கள், செய்திகளை வெளிப்படுத்த தடை விதித்துள்ளது.
ஐஎப்ஏபி-யின் வழிகாட்டி நெறிமுறைகளில் கூறுப்படுகையில், விளையாட்டு உபகரணங்களில் அரசியல், மதம் அல்லது தனிப்பட்ட கருத்துகள் சார்ந்த முழக்கங்கள், வாசகங்கள் அல்லது படங்கள் இருக்கக் கூடாது. தயாரிப்பாளரின் சின்னம், பிற விளம்பரங்கள் தவிர்த்து, அரசியல், மதம் அல்லது தனிப்பட்ட கருத்துகள் சார்ந்த முழக்கங்கள், வாசகங்கள் அல்லது படங்கள் ஏதும் இடம் பெறக்கூடாது.
எந்த ஒரு விதிமீறல் நடந்தாலும், போட்டியின் அமைப்பாளர், தேசிய கால்பந்து சங்கம், ஃபிஃபா ஆகியவை மூலம் வீரர் அல்லது அந்த அணி மீது நடவடிக்கை எடுக்கப்படும். அரசியல், பாகுபாடு ஏற்படுத்தும் பேனர்கள், கொடிகள், துண்டுப் பிரசுரங்கள், ஆடைகள் மற்றும் பிற பொருட்களை மைதானத்துக்குள் கொண்டு வருவதையும் ஃபிஃபாவின் நடத்தைவிதிகள் தடை செய்கிறது.
ஆதலால், இந்தப் போட்டியில் அர்ஜெண்டினா வீரர்கள் லாஸ் மால்வினாஸ் பேனரை கொண்டு வந்து காண்பித்தது தவறு என்று ஃபிஃபா உணர்ந்தால், போட்டியின் விதிகளை மீறியதாக உணர்ந்தால் அர்ஜெண்டினா அணியினர் மீது நடவடிக்கை எடுக்கப்படலாம்.
ஏற்கெனவே 2014-ம் ஆண்டு லா பால்டாவில் ஸ்லோவேனியாவுக்கு எதிராக நடந்த நட்புரீதியான ஆட்டத்தில், அர்ஜெண்டினா வீரர்கள் இதுபோன்று பேனரை வெளிப்படுத்தி கொண்டாடினர். இதற்கு அர்ஜெண்டினா கால்பந்து அமைப்பு மீது 19,540 யூரோக்கள் அபராதமாக சர்வதேச கால்பந்து கூட்டமைப்பு விதித்தது குறிப்பிடத்தக்கது.
அர்ஜெண்டினா அரசு என்ன சொல்கிறது?
ஃபிஃபா அரையிறுதி போட்டி நடப்பதற்கு சில நாட்களுக்கு முன், அர்ஜெண்டினா வெளியுறவுத் துறை, மால்வினாஸ் விவகாரம் தொடர்பாக அதிகாரபூர்வ அறிக்கை வெளியிட்டிருந்தது. அதில், ‘மால்வினாஸ் தீவு, தெற்கு ஜார்ஜியா, சவுத் சான்ட்விச் தீவு அதைச் சுற்றியுள்ள கடற்சார் பகுதிகள் எங்களுக்கு உரியது, அதில் முழுமையான இறையாண்மை எங்கள் நாட்டுக்கே இருக்கிறது’ என்று அறிக்கை வெளியிட்டிருந்தது.
மேலும் ‘1993-ம் ஆண்டு ஜூலை 12ம் தேதி ஐ.நா அதிகாரிகள் முன்னிலையில் இரு நாடுகளும் சேர்ந்து செய்து கொண்ட ஒப்பந்தத்தின்படி பரஸ்பர நம்பிக்கையை வலுப்படுத்த வேண்டும். ஆனால், பிரிட்டனும், நெதர்லாந்தும் ஒப்பந்தத்தை மீறி தன்னிச்சையாக அர்ஜெண்டினா இறையாண்மைக்கு உட்பட்ட கடற்பகுதிக்குள் அத்துமீறுகின்றன. இரு நாடுகளின் இறையாண்மையை மதித்து நடக்க வேண்டும் என்ற ஐ.நா.வின் ஒப்பந்தத்தை மீறிய செயல்” என்று தெரிவித்திருந்தது.
இது தொடர்பாக பிரிட்டன் தூதரகம், நெதர்லாந்து தூதரகம் அருகே போராட்டமும், தங்களின் எதிர்ப்பு அடங்கிய மனுவும் கொடுக்கப்படும் எனத் தெரிவிக்கப்பட்டிருந்தது.