மும்பை: மகளிர் பிரீமியர் லீக் டி 20 கிரிக்கெட் தொடரின் 4-வது சீசன் 2026-ம் ஆண்டு ஜனவரி 9 முதல் பிப்ரவரி வரை நவி மும்பையில் உள்ள டி.ஓய்.பாட்டீல் மைதானம் மற்றும் வதோதராவில் உள்ள கோடாம்பி மைதானம் ஆகியவற்றில் நடைபெறுகிறது.
இந்த தொடருக்கான போட்டி அட்டவணை நேற்று வெளியிடப்பட்டது. இதன்படி 28 நாட்களில் 22 போட்டிகள் நடைபெறுகின்றன.
ஜனவரி 9-ம் தேதி நவி மும்பையில் நடைபெறும் தொடக்க ஆட்டத்தில் நடப்பு சாம்பியனான ஹர்மன் பிரீத் கவுர் தலைமையிலான மும்பை இந்தியன்ஸ் அணி, 2024-ம் ஆண்டு சாம்பியனான ராயல் சாலஞ்சர்ஸ் பெங்களூரு அணியுடன் மோதுகிறது. டி.ஓய்.பாட்டீல் மைதானத்தில் 11 ஆட்டங்கள் நடைபெறுகின்றன. இதில் ஜனவரி 10 மற்றும் 17-ம் தேதிகளில் ஒரே நாளில் நடைபெறும் இரு ஆட்டங்களும் அடங்கும்.
மீதம் உள்ள 10 ஆட்டங்களும் வதோதராவில் நடைபெறுகிறது. எலிமினேட்டர் ஆட்டம் பிப்ரவரி 3-ம் தேதியும், இறுதிப் போட்டி 5-ம் தேதியும் நடைபெறுகின்றன. தொடரில் கலந்துகொண்டுள்ள 5 அணிகளும் ரவுண்ட் ராபின் அடிப்படையில் தலா இரு முறை நேருக்கு நேர் மோதும்.
லீக் சுற்றில் முதலிடம் பிடிக்கும் அணி இறுதிப் போட்டிக்கு நேரடியாக தகுதி பெறும். 3-வது மற்றும் 4-வது இடத்தை பிடிக்கும் அணிகள் எலி மினேட்டர் ஆட்டத்தில் பலப்பரீட்சை நடத்தும்.
இதில் வெற்றி பெறும் அணி 2-வது அணியாக இறுதிப் போட்டியில் கால்பதிக்கும். மகளிர் பிரீமியர் லீக்கில் மும்பை இந்தியன்ஸ் அணி 2 முறை பட்டம் வென்றுள்ளது.
ராயல் சாலஞ்சர்ஸ் அணி 2024-ல் வாகை சூடியிருந்தது. டெல்லி அணி 3 சீசனிலும் இறுதிப் போட்டி வரை முன்னேறியிருந்தது. குஜராத் ஜெயண்ட்ஸ், யுபி வாரியர்ஸ் அணிகள் இதுவரை இறுதிப் போட்டிக்கு முன்னேறியது இல்லை.