திருமலை: வரும் நவம்பர் மாதத்தில் திருப்பதி ஏழுமலையானை தரிசிப்பதற்கான பல்வேறு ஆர்ஜித சேவைகள், சிறப்பு தரிசன டிக்கெட்டுகள் மற்றும் தங்கும் அறைகளுக்கான ஆன்லைன் டிக்கெட்டுகளை திருமலை திருப்பதி தேவஸ்தானம் இன்று முதல் தனது அதிகாரப்பூர்வ இணையதளத்தில் வெளியிடுகிறது.
இன்று (18-ம் தேதி) காலை 10 மணி முதல் 20-ம் தேதி காலை 10 மணி வரை, பக்தர்கள் குலுக்கல் முறையில் சுப்ரபாதம், தோமாலை சேவை, அர்ச்சனை, அஷ்டதள பாத பத்மாராதனை போன்ற ஆர்ஜித சேவைகளுக்கான டிக்கெட்டுகளை முன்பதிவு செய்து கொள்ளலாம்.
தொடர்ந்து, 21-ம் தேதி புதன்கிழமை காலை 10 மணிக்கு திருக்கல்யாண உற்சவம், ஊஞ்சல் சேவை, ஆர்ஜித பிரம்மோற்சவம், சகஸ்ர தீப அலங்கார சேவைகளுக்கான டிக்கெட்டுகளை பக்தர்கள் முன்பதிவு செய்து கொள்ளலாம்.
24-ம் தேதி காலை 10 மணிக்கு இலவசமாக அங்கபிரதட்சண டோக்கன்களும், 11 மணிக்கு ஸ்ரீவாணி அறக்கட்டளைக்கான டிக்கெட்டுகளும், இதே நாள் மதியம் 3 மணிக்கு மாற்று திறனாளி பக்தர்கள் மற்றும் மூத்த குடிமகன்களுக்கான டிக்கெட்டுகளையும் முன்பதிவு செய்து கொள்ளலாம்.
இம்மாதம் 24-ம் தேதி காலை 10 மணிக்கு நவம்பர் மாதத்திற்கான ரூ.300 சிறப்பு தரிசன டிக்கெட்டுகளை பக்தர்கள் முன்பதிவு செய்து கொள்ளலாம். இவை அனைத்தும் ttdevasthanams.ap.gov.in என்ற இணைய தளத்தில் பக்தர்கள் முன்பதிவு செய்து கொள்ளலாம்.