படம்: எல்.சீனிவாசன்
திருவல்லிக்கேணி பார்த்தசாரதி கோயிலில் வைகுண்ட ஏகாதசியை முன்னிட்டு மேற்கொள்ள வேண்டிய பணிகள் குறித்து பல்வேறு துறை அலுவலர்களுடன் இந்து சமய அறநிலையத்துறை அமைச்சர் பி.கே.சேகர்பாபு நேற்று ஆலோசனை மேற்கொண்டார்.
அப்போது செய்தியாளர்களிடம் அவர் கூறியதாவது: வைகுண்ட ஏகாதசியை முன்னிட்டு அனைத்து வைணவ கோயில்களிலும், சிறப்பான ஏற்பாடுகள் மேற்கொள்ளப்பட்டு வருகின்றன. திருவல்லிக்கேணி பார்த்தசாரதி கோயிலில் அனைத்து சிறப்பு கட்டண தரிசனங்களும் ரத்து செய்யப்பட்டுள்ளன. அதேநேரம், டிச.30-ம் தேதி நடைபெறும் பரமபத வாசல் திறப்பு நிகழ்ச்சிக்கு ரூ.500 கட்டணத்தில் 1,800 பேர் அனுமதிக்கப்படுவார்கள்.
வைகுண்ட ஏகாதசி விழாவில் சுமார் 1 லட்சம் பக்தர்கள் கலந்து கொள்வார்கள் என எதிர்பார்க்கப்படுகிறது. பக்தர்களுக்கு குடிநீர், கழிப்பிட வசதி, மருத்துவ வசதி போன்றவை ஏற்படுத்தப்பட்டுள்ளன. மேலும், பாதுகாப்பு பணிகளில் 1,500 காவலர்கள் சுழற்சி முறையில் பணியமர்த்தப்பட்டுள்ளனர். தீயணைப்பு வாகனங்கள், 6 மருத்துவக் குழுக்கள், 3 ஆம்புலன்ஸ் வாகனங்களும் தயார் நிலையில் வைக்கப்படும்.
வைகுண்ட ஏகாதசி அன்று, 70 வயதைக் கடந்த மூத்த குடிமக்கள் மற்றும் மாற்றுத் திறனாளிகளுக்கு காலை 11 மணி முதல் மதியம் 1 மணி வரையிலும், பிற்பகல் 2 மணி முதல் மாலை 4 மணி வரையிலும் சிறப்பு தரிசனத்துக்கு நேரம் ஒதுக்கப்பட்டுள்ளது. இவ்வாறு அவர் கூறினார்.