திரைப்படப் பாடலாசிரியரும் கவிஞருமான வாலியின் பிறந்தநாளை முன்னிட்டு ஆண்டு தோறும் வாலி பதிப்பகம் சார்பில், ‘வாலி விருது’ வழங்கப்பட்டு வருகிறது. கவிஞர் ஒருவருக்கும் எழுத்தாளர் ஒருவருக்கும் வழங்கப்படும் இந்த விருது தலா ரூ.50 ஆயிரம் விருதுத் தொகையும், பொற்கிழியும் கொண்டது.
2026ஆம் ஆண்டுக்கான வாலி விருதுக்கு கவிஞர் அறிவுமதியும், திரைப்பட ஆய்வாளர் திருநின்றவூர் சந்தான கிருஷ்ணனும் தேர்வு செய்யப்பட்டுள்ளனர். அக்டோபர் 31ஆம் தேதி சேலத்தில் நடைபெறும் விழாவில், மலேசிய மேனாள் அமைச்சர் டத்தோ சரவணன் விருதுகளை வழங்குகிறார்.
அழ. வள்ளியப்பா இலக்கியப் போட்டி:
வள்ளியப்பா இலக்கிய வட்டம் சார்பில் குழந்தை இலக்கியப் போட்டிகள் அறிவிக்கப்பட்டுள்ளன. இதுகுறித்து வெளியிடப்பட்டுள்ள செய்திக்குறிப்பில், 2024-2025ஆம் ஆண்டுகளில் வெளியான குழந்தைகளுக்கான சிறந்த பாடல் நூல் ஒன்றுக்கு வள்ளியப்பா இலக்கிய விருதும் ரூ.10 ஆயிரம் ரொக்கப் பரிசும் வழங்கப்படும்.
மேலும், பள்ளி மாணவர்களுக்கான சிறுவர் பாடல் போட்டி நடத்தப்படுகின்றது. இதில் 6ஆம் வகுப்பு முதல் 12ஆம் வகுப்பு வரை பயிலும் மாணவர்கள் பங்கு பெறலாம்.
முதல் பரிசாக ரூ.3000, இரண்டாம் பரிசாக ரூ.2000, மூன்றாகம் பரிசாக ரூ.1000 வழங்கப்படும். போட்டிகளுக்கு எழுத்தாளர்கள் தங்கள் நூல்களின் மூன்று பிரதிகளையும், பள்ளி மாணவர்கள் சிறுவர் பாடல்களையும் தேவி நாச்சியப்பன், குழந்தைக் கவிஞர் இல்லம், 3/628. 9ஆம் வீதி வடக்கு விரிவு, சுப்பிரமணியபுரம், காரைக்குடி 630003 என்ற முகவரிக்கு, இம்மாதம் 16ஆம் தேதிக்குள் அனுப்பிவைக்க வேண்டும் என்று தெரிவிக்கப்பட்டுள்ளது.