ஒரு விருது என்பது வெறும் பதக்கம் அல்ல; அது ஒரு காலகட்டம் தன்னைத்தானே வாசித்துப் பார்க்கும் கண்ணாடி. 57 ஆண்டுகளாக ஆங்கிலப் புனைவின் திசையைத் தீர்மானிப்பதில் புக்கர் பரிசு பெரும் தாக்கம் செலுத்துகிறது. அத்தகைய முக்கியத்துவம் மிகுந்த புக்கர் பரிசு இந்த ஆண்டு யாருக்குக் கிடைக்கப் போகிறது என்பது உலகெங்கிலும் உள்ள இலக்கிய ஆர்வலர்கள் மத்தியில் பெரும் எதிர்பார்ப்பை ஏற்படுத்தியிருக்கிறது.
இந்த ஆண்டு போட்டிக்கு வந்த 163 நூல்களில் இருந்து ஜூலை 28இல் வெளியான நீண்ட பட்டியலுக்கு 13 படைப்புகளும், அதிலிருந்து செப்டம்பர் 22இல் வெளியான சுருக்கப் பட்டியலில் 6 படைப்புகளும் தேர்வாகியுள்ளன.
1969இல் தொடங்கிய இந்தப் பரிசு, முதலில் நிதியுதவி செய்த புக்கர் நிறுவனத்தின் பெயருடன் திகழ்கிறது. தற்போது இந்தப் பரிசுப் போட்டியை புக்கர் பரிசு அறக்கட்டளை நடத்துகிறது. எழுத்தாளர் நேரடியாக விண்ணப்பிக்க இயலாது; இங்கிலாந்து, அயர்லாந்துப் பதிப்பகங்கள் மட்டுமே நூல்களைச் சமர்ப்பிக்க முடியும். வெற்றியாளருக்கு 50,000 பவுண்டும் (சுமார் ரூ. 54 லட்சம்),இறுதிப் பட்டியலில் இடம்பெற்ற மற்ற ஐந்து பேருக்கும் தலா 2,500 பவுண்டும் பரிசாக வழங்கப்படுகிறது.
