புதுடெல்லி: உம்மிடி பங்காரு ஜூவல்லர்ஸ் நிறுவனத்தின் மூத்த குடும்ப உறுப்பினரும் இந்தியாவின் வரலாற்றுச் சிறப்புமிக்க செங்கோலை வடிவமைத்தவருமான உம்மிடி எத்திராஜ் சென்னையில் நேற்று காலமானார்.
சென்னையில் கடந்த 1900 முதல் இயங்கி வரும் பாரம்பரியமிக்க தங்கம், வைர நகைக்கடை உம்மிடி ஜூவல்லர்ஸ். 125 ஆண்டுகள் பழமை வாய்ந்த இந்நிறுவனத்தின் மூத்த குடும்ப உறுப்பினரான உம்மிடி எத்திராஜ் வயது முதிர்வு மற்றும் உடல்நலக்குறைவு காரணமாக சென்னையில் நேற்று காலமானார்.
அவருக்கு வயது 99. அவரது இறுதிச் சடங்குகள் நேற்று நடைபெற்றன. உம்மிடி எத்திராஜ் மறைவுக்கு குடியரசு தலைவர் திரவுபதி முர்மு, குடியரசு துணைத் தலைவர் சி.பி.ராதாகிருஷ்ணன், பிரதமர் நரேந்திர மோடி, தமிழக ஆளுநர் ஆர்.வி.அர்லேகர் ஆகியோர் இரங்கல் தெரிவித்துள்ளனர்.
குடியரசு துணைத் தலைவர் சி.பி.ராதாகிருஷ்ணன் எக்ஸ் தளத்தில் வெளியிட்ட பதிவில், “இந்திய நாகரீக பாரம்பரியத்தின் புனித அடையாளமாக திகழும் செங்கோலை உருவாக்கிய உம்மிடி எத்திராஜ் என்றும் நன்றியோடும் மரியாதையோடும் நினைவுகூரப்படுவார்” என குறிப்பிட்டுள்ளார்.
பிரதமர் மோடி வெளியிட்ட பதிவில், “நாட்டின் முதல் பிரதமர் நேருவிடம் ஒப்படைக்கப்பட்ட வரலாற்று சிறப்பு வாய்ந்த செங்கோலை வடிவமைத்த நகை கலைஞர் உம்மிடி எத்திராஜ் என்றும் நினைவுகூரப்படுவார்.
புதிய நாடாளுமன்ற கட்டிடத்தில் அந்த செங்கோலை நிறுவும் தினத்தில் அவரை நேரில் சந்திக்கும் பாக்கியம் பெற்றேன். நம் நாட்டுக்கும் கலாசாரத்துக்கும் அவர் செய்த பணிக்காக அவருக்கு நன்றி தெரிவித்தேன். அவரது குடும்பத்தினருக்கு ஆழ்ந்த இரங்கலை தெரிவித்துக் கொள்கிறேன்” என கூறியுள்ளார்.
கடந்த 1947-ல் இந்தியா சுதந்திரம் அடைந்தபோது ஆங்கிலேயர்களிடமிருந்து இந்தியாவுக்கு அதிகாரம் கைமாறுவதைக் குறிக்கும் வகையில் நாட்டின் முதல் பிரதமர் நேருவிடம் தங்கம் முலாம் பூசப்பட்ட செங்கோல் ஒப்படைக்கப்பட்டது.
வரலாற்றுச் சிறப்புமிக்க அந்த செங்கோலை வடிவமைத்தவர் உம்மிடி எத்திராஜ் என்பது குறிப்பிடத்தக்கது. 2023-ம் ஆண்டு இந்த செங்கோல்புதிதாக கட்டப்பட்ட நாடாளுமன்ற கட்டிடத்தில் நிறுவப்பட்டபோது பிரதமர், உம்மிடி எத்திராஜை நேரில் அழைத்து கவுரவித்தார்.