புதுடெல்லி: பாஜகவின் தாய் அமைப்பான ஆர்எஸ்எஸ் அமைப்பில் சுமார் 40 முக்கிய பிரிவுகள் உள்ளன. இதுதவிர சுமார் 2,500 துணை பிரிவுகளும் செயல்படுகின்றன. இவற்றில் வழக்கறிஞர்களுக்காக அகில பாரதிய அதிவக்த பரிஷத் (ஏபிஏபி) 1992-ல் தொடங்கப்பட்டது. இதன் தமிழ்நாடு கிளையாக, அகில பாரத வழக்கறிஞர்கள் சங்கம் (ஏபிவிஎஸ்) 2013-ல் தொடங்கப்பட்டது. இதில் தென் தமிழ்நாடு மற்றும் வடக்கு தமிழ்நாடு என இரு பிரிவுகள் உள்ளன.
ஏபிவிஎஸ் சார்பில் கடந்த வருடம் இளம் வழக்கறிஞர்களுக்கான உச்ச நீதிமன்றப் பயிற்சி முகாம் ’சுப்ரீம் விஷன்’ எனும் பெயரில் முதன்முறையாகத் தொடங்கியது. இரண்டாவது பயிற்சி முகாம் கடந்த செப்டம்பர் 23 முதல் அக்டோபர் 1 வரை டெல்லியில் நடைபெற்றது. இதில், தென் தமிழ்நாடு பிரிவைச் சேர்ந்த தலா ஐந்து ஆண், பெண் இளம் வழக்கறிஞர்கள் கலந்து கொண்டனர். இவர்கள் அனைவரும் கீழமை நீதிமன்ற வழக்கறிஞர்கள் ஆவர்.
இவர்கள் உச்ச நீதிமன்றத்தின் செயல்பாடுகள் குறித்து அறிந்து கொண்டனர். இதற்காக, மூத்த வழக்கறிஞர்களின் உதவியாளர்களாக இணைந்து பணியாற்றினர்.
இதுகுறித்து ‘இந்து தமிழ் திசை’யிடம் பயிற்சி பெற்றவர்களில் ஒருவரான பழனி மாவட்ட கிளைச் செயலாளர் எம்.கோகுல் கூறும்போது, ‘எங்கள் தொழிலின் மிகப்பெரியக் கனவாக இருப்பது உச்ச நீதிமன்ற நேரடி அனுபவம். பயிற்சி நாட்களில், எங்களுக்கு தமிழரான உச்ச நீதிமன்றத்தின் நீதிபதி வி.மோகனாவை சந்திக்கும் வாய்ப்பும் கிடைத்தது. அப்போது அவர் ஒரு வழக்கறிஞர் எவ்வாறு செயல்பட வேண்டும், நீதிபரிபாலனத்தில் வழக்கறிஞர்களின் பங்கு மற்றும் முக்கியத்துவம் குறித்து அறிவுரை வழங்கினார்’ என்றார்.
பயிற்சியின் நிறைவு நிகழ்ச்சியில் அகில பாரத அதிவக்த பரிஷத் தலைவரும் கேரளா உயர் நீதிமன்றத்தின் ஓய்வுபெற்ற நீதிபதியான எம்.நகரெஷ், உச்ச நீதிமன்ற மூத்த வழக்கறிஞரான செயலாளர் பி.பரத் குமார் கலந்துகொண்டனர். இவர்கள், பயிற்சிபெற்ற இளம் வழக்கறிஞர்களுக்கு சான்றிதழ்கள் வழங்கி சிறப்பித்தனர்.