மும்பை: பாலிவுட் நடிகர் டைகர் ஷெராப் மீதான தாக்குதல் முடிந்ததும் ஆபரேஷன் நிறைவு என குற்றவாளிகள் தகவல் அனுப்பியது போலீஸார் நடத்திய விசாரணையில் தெரியவந்துள்ளது.
கடந்த 17-ம் தேதி மகாராஷ்டிர மாநிலம் மும்பை நகரில் ஜுஹு பகுதியில் உள்ள கால்பந்து மைதானத்துக்கு சென்றுள்ளார் பிரபல பாலிவுட் நடிகர் டைகர் ஷெராப். அங்கிருந்து காரில் திரும்பும்போது மர்ம நபர்கள் அவர் மீது துப்பாக்கிச்சூடு நடத்தினர். இதில், நடிகர் டைகர், அவரது டிரைவர் காயமடைந்தனர். இந்த சம்பவத்தில் ஈடுபட்ட மர்ம நபர்களைப் பிடிக்க 15 தனிப்படைகள் அமைக்கப்பட்டன.
இதில், சந்தேகத்தின் பேரில் 3 பேரை ராஜஸ்தான் மாநிலம் கோட்டாவில் போலீஸார் கைது செய்தனர். இந்த தாக்குதலுக்கு பிரபல தாதா லாரன்ஸ் பிஷ்னோய் கும்பல் பொறுப்பேற்று உள்ளது.
கைது செய்யப்பட்ட 3 பேரிடம் போலீஸார் நடத்திய விசாரணையில், இந்தத் தாக்குதலில் ஈடுபட்டவர்களுக்கு ரூ.50 ஆயிரம் முன்பணமாக வழங்கப்பட்டது தெரியவந்துள்ளது.
இதுகுறித்து போலீஸ் மூத்த அதிகாரி ஒருவர் கூறும்போது, “டைகர் ஷெராப் மீதான தாக்குதல் வெற்றிகரமாக முடிந்தால் கூடுதல் பணம் தருவதாகத் தெரிவிக்கப்பட்டுள்ளது. தாக்குதல் முடிந்ததும் ‘ஆபரேஷன் நிறைவுற்றது’ என்று அவர்கள், தங்களை இந்த சம்பவத்தில் ஈடுபடுத்திய நபர்களுக்கு எஸ்எம்எஸ் மூலம் தகவல் அனுப்பியுள்ளனர்.
சிறையில் அடைக்கப்பட்டுள்ள தாதா லாரன்ஸ் பிஷ்னோயின் கூட்டாளியான அனில் பண்டிட், இந்தச் சதித்திட்டத்தில் முக்கியப் பங்கு வகித்திருக்கலாம் என்று சந்தேகிக்கிறோம்’’ என்றார்.
மொட்டை அடித்துக் கொண்டு தலைமறைவு
டைகர் ஷெராப் மீது துப்பாக்கியால் சுட்டு தாக்குதல் நடத்திய ஹிருத்திக் குமார் என்கிற ரோஷன் போலீஸாரிடம் சிக்காமல் இருக்க தனது தலையை மொட்டை அடித்துக் கொண்டு தலைமறைவாக இருந்துள்ளார்.
மேலும், அடிக்கடி வாடகை வீடுகளை மாற்றியும் வந்துள்ளார். மும்பைக்கு வருவதற்கு முன்பு அவர் நீண்ட தலைமுடி வைத்திருந்தார். டைகர் மீது தாக்குதல் நடத்திய பின்னர் அப்பகுதி மக்கள் தன்னை அடையாளம் காண்பதைத் தவிர்க்க தனது தலையை மொட்டை அடித்துக் கொண்டுள்ளார். ஹிருத்திக் ஏற்கனவே குற்றப் பின்னணி கொண்டவர் என்பதால், அவரது விவரங்கள் போலீஸாரிடம் உள்ளன. அந்த தகவல்களின் அடிப்படையில் அவரை போலீஸார் கைது செய்தனர்.