அமராவதி: ஆந்திர மாநிலத்தில் சமீபத்தில் நகராட்சி, மாநகராட்சி, ஊராட்சி மன்றத் தேர்தல்கள் நடந்து முடிந்தன. இதில் ஆளும் தெலுங்கு தேச கூட்டணிக் கட்சிகள் மாபெரும் வெற்றியைப் பெற்றுள்ளன.
இதுகுறித்து ஆந்திர முதல்வர் சந்திரபாபு நாயுடு நேற்று அமராவதியில் செய்தியாளர்களிடம் பேசியதாவது: கடந்த 2024-ல் நடைபெற்ற பொதுத் தேர்தலைவிட, தற்போது நடைபெற்ற உள்ளாட்சித் தேர்தலில் தெலுங்கு தேசமும் அதன் கூட்டணிக் கட்சிகளும் மாபெரும் வெற்றி பெற்றுள்ளன. இந்த தேர்தலில் எங்கள் கூட்டணிக்கு 58.90% வாக்குகள் கிடைத்துள்ளன. ஒய்.எஸ்.ஆர். காங்கிரஸ் கட்சிக்கு 33.56 சதவீதம் கிடைத்துள்ளன. பொதுத் தேர்தலுடன் ஒப்பிடுகையில், ஒய்.எஸ்.ஆர். காங்கிரஸ் கட்சிக்கு 6.25 சதவீத வாக்குகள் குறைந்துள்ளன.
நகர்ப்புறங்களில் எங்களுக்கு 59.9% வாக்குகள் கிடைத்துள்ளன. கடந்த இரண்டரை ஆண்டுகள் நல்லாட்சி புரிந்துள்ளோம் என்பதற்கு இதுவே சிறந்த எடுத்துக்காட்டு. எங்கள் மீது இவ்வளவு நம்பிக்கை வைத்துள்ள மக்களை சிரம் தாழ்த்தி வணங்குகிறோம். மேயர், சேர்மேன் பதவிகளுக்கான தேர்தலில் 94% இடங்களில் வெற்றி பெற்றுள்ளோம். 13 மாநகராட்சிகளில் 12-ஐக் கைப்பற்றியுள்ளோம். 87 நகராட்சித் தலைவர் பதவிகளில் 82-ல் வெற்றி பெற்றுள்ளோம். 3,941 வார்டுகளில் 3,233-ல் வெற்றி பெற்றுள்ளோம். இவ்வாறு அவர் தெரிவித்தார்.