சோனம் வாங்சு
புதுடெல்லி: உண்ணாவிரதம் மேற்கொண்டு வரும் சோனம் வாங்சுக்கை மேல் சிகிச்சைக்காக தனியார் மருத்துவமனைக்கு மாற்ற உயர் நீதிமன்றம் அனுமதி அளித்துள்ளது.
நீட் தேர்வு வினாத்தாள் கசிவு உள்ளிட்ட போட்டித் தேர்வு முறைகேடு விவகாரத்தில் மத்திய கல்வி அமைச்சர் தர்மேந்திர பிரதான் பதவி விலக வலியுறுத்தி, காலநிலை ஆர்வலர் சோனம் வாங்சுக் டெல்லி ஜந்தர் மந்தரில் ஜூன் 28ம் தேதி காலவரையற்ற உண்ணாவிரதப் போராட்டம் தொடங்கினார்.
அவரது உடல்நிலை மோசமடைந்தது. இதையடுத்து, டெல்லி உயர் நீதிமன்ற உத்தரவுப்படி கடந்த 18-ம் தேதி மத்திய அரசின் சப்தர்ஜங் மருத்துவமனையில் வலுக்கட்டாயமாக அனுமதிக்கப்பட்டார். ஆனாலும் அவர் உண்ணாவிரத போராட்டத்தை தொடர்கிறார்.
இந்நிலையில், வாங்சுக்கை தனியார் மருத்துவமனைக்கு மாற்றக்கோரி அவரது மனைவி கீதாஞ்சலி டெல்லி உயர் நீதிமன்றத்தில் மனு தாக்கல் செய்தார். அதில், தனது கணவரின் உடல்நிலை குறித்து முரண்பட்ட அறிக்கை வெளியிடப்படுவதாக குற்றம்சாட்டி இருந்தார். இந்த மனுவை தனி நீதிபதி தள்ளுபடி செய்தார். இதையடுத்து கீதாஞ்சலி மேல்முறையீடு செய்தார்.
இந்த மனுவை தலைமை நீதிபதி டி.கே.உபாத்யாயா மற்றும் நீதிபதி தேஜஸ் காரியா அடங்கிய அமர்வு விசாரித்தது. விசாரணையின்போது, வாங்சுக்கை தனியார் மருத்துவமனைக்கு மாற்றுவதில் ஆட்சேபணை இல்லை என்று மத்திய அரசு தரப்பில் தெரிவிக்கப்பட்டது.
இதையடுத்து நீதிபதிகள் பிறப்பித்த உத்தரவில், “சோனம் வாங்சுக்கை மேல் சிகிச்சைக்காக குருகிராமில் உள்ள மெதாந்தா மருத்துவமனைக்கு மாற்ற வேண்டும். இது அவருடைய அடிப்படை உரிமையை பாதுகாக்கும்.
மேலும், சிகிச்சையின்போது அவரது ஆரோக்கியத்தை உன்னிப்பாகக் கண்காணிக்க தகுதியான மருத்துவர்கள் அடங்கிய குழுவை அமைக்க வேண்டும் அவருக்கு சிகிச்சை தொடர்ச்சியாகவும் தடையின்றியும் கிடைப்பதை உறுதி செய்யும் வகையில், சப்தர்ஜங் மருத்துவமனையில் அளிக்கப்பட்ட சிகிச்சை தொடர்பான அனைத்து மருத்துவப் பதிவுகள், சிகிச்சை விவரங்கள், பரிசோதனை அறிக்கைகள் மற்றும் பிற ஆவணங்களை மெதாந்தா மருத்துவமனை மருத்துவர்களிடம் ஒப்படைக்க வேண்டும்” என கூறப்பட்டுள்ளது.
இதுகுறித்து கீதாஞ்சலி எக்ஸ் தளத்தில் வெளியிட்ட பதிவில், “என் கணவர் சோனம் வாங்சுக்கை தனியார் மருத்துவமனைக்கு மாற்ற உத்தரவிட்ட உயர் நீதிமன்றத்துக்கு மனமார்ந்த நன்றியை தெரிவித்துக் கொள்கிறேன்” என கூறியுள்ளார். இந்நிலையில், சோனம் வாங்சுக் குருகிராமில் உள்ள மெதாந்தா மருத்துவமனைக்கு நேற்று மாலை மாற்றப்பட்டார். அங்கு அவரது உடல்நிலையை கண்காணித்து வருகின்றனர்.