சண்டிகர்: பஞ்சாப் மாநிலத்தைச் சேர்ந்தவர் பர்வீந்தர் சிங் ஜோட்டா. சமூக செயற்பாட்டாளரான இவர் போதை மருந்து விற்பனை, சட்டவிரோத மருந்து விற்பனை்களை தடுத்து வருகிறார். இவரது ஃபேஸ்புக் பக்கத்தை 24 ஆயிரத்துக்கும் அதிகமானோர் பின்பற்றி வருகின்றனர்.
இந்நிலையில் பஞ்சாபின் மான்சா பகுதியிலுள்ள ஒரு மருந்துக் கடையில் சட்டவிரோதமாக போதை மருந்துகள் விற்பனை செய்வது பர்வீந்தர் சிங்குக்கு தெரியவந்தது. இதையடுத்து தனது ஃபேஸ்புக் பக்கத்தை லைவ் செய்துவிட்டு நேற்று காலை அந்தக் கடைக்குச் சென்று கடை உரிமையாளருடன் அவர் வாக்குவாதம் செய்தார்.
சட்டவிரோதமாக போதைப் பொருட்கள் விற்பனை செய்தால் அதை நான் தடுப்பேன். முடிந்தால் என்னைக் கொல் என்று கடை உரிமையாளரிடம் பர்வீந்தர் கூறினார்.
தொடர்ந்து வாக்குவாதம் முற்றவே, கடை உரிமையாளர் தன்னிடமிருந்த துப்பாக்கியை எடுத்து பர்வீந்தரை சுட்டார். இதில் அவர் உயிரிழந்தார். போலீஸார் விரைந்து வந்து பர்வீந்தரின் உடலைக் கைப்பற்றி மருத்துவமனைக்கு அனுப்பி வைத்தனர். மருந்துக் கடை உரிமையாளர் உள்ளிட்டோரை கைது செய்து போலீஸார் விசாரித்து வருகின்றனர்.