புதுடெல்லி: பிரிக்ஸ் கூட்டமைப்பு நாடுகளின் எம்பிக்களுடன் பிரதமர் நரேந்திர மோடி டெல்லியில் நேற்று கலந்துரையாடினார்.
பிரிக்ஸ் கூட்டமைப்பில் இந்தியா, ரஷ்யா, சீனா உள்ளிட்ட 11 நாடுகள் உறுப்பினர்களாக உள்ளன. இந்த கூட்டமைப்பின் உச்சி மாநாடு கடந்த செப்டம்பரில் டெல்லியில் நடைபெற்றது. இதன் தொடர்ச்சியாக பிரிக்ஸ் நாடாளுமன்ற கூட்டமைப்பின் இரு நாள் சபாநாயகர்கள் மாநாடு பழைய நாடாளுமன்ற கட்டிடத்தில் நேற்று தொடங்கியது. இதில் பிரிக்ஸ் நாடுகளின் நாடாளுமன்ற சபாநாயகர்கள், துணை சபாநாயகர்கள், மூத்த எம்பிக்கள் பங்கேற்றனர்.
மக்களவை சபாநாயகர் ஓம் பிர்லா மாநாட்டை தொடங்கி வைத்தார். அப்போது அவர் பேசியதாவது: பிரதமர் நரேந்திர மோடி தலைமையில் அண்மையில் நடைபெற்ற பிரிக்ஸ் உச்சி மாநாட்டில் ஒருமித்த கருத்துடன் கூட்டறிக்கை வெளியிடப்பட்டது. இது ஒரு மைல் கல் ஆகும். பிரிக்ஸ் நாடுகளில் நாடாளுமன்ற கட்டமைப்பை வலுப்படுத்த வேண்டும்.
சர்வதேச சவால்களுக்கு தீர்வு காண பிரிக்ஸ் நாடுகளின் நாடாளுமன்றங்கள் ஒன்றிணைந்து செயல்பட வேண்டும். போர் பதற்றங்களை தணிக்க ஆக்கப்பூர்வமான நடவடிக்கைகளை எடுக்க வேண்டும். சர்வதேச அரங்கில் குளோபல் சவுத் கூட்டமைப்பின் குரல் ஓங்கி ஒலிக்க வேண்டும். இவ்வாறு சபாநாயகர் ஓம் பிர்லா பேசினார்.
மாநாட்டில் பங்கேற்ற பிரிக்ஸ் நாடாளுமன்ற குழுவினருடன் பிரதமர் நரேந்திர மோடி நேற்று கலந்துரையாடினார். இதுகுறித்து சமூக வலைதளத்தில் அவர் வெளியிட்ட பதிவில், “பிரிக்ஸ் நாடுகளின் எம்பிக்களுடன் ஆக்கப்பூர்வமான கலந்துரையாடலை நடத்தினேன். பல்வேறு விவகாரங்கள் குறித்து நாங்கள் விரிவாக விவாதித்தோம்” என்று தெரிவித்துள்ளார்.