புதுடெல்லி: வளர்ச்சி அடைந்த இந்தியாவை உருவாக்க மிக முக்கிய தூணாக யுபிஎஸ்சி செயல்படுகிறது என்று பிரதமர் நரேந்திர மோடி தெரிவித்துள்ளார்.
ஆங்கிலேயர் ஆட்சிக் காலத்தின்போது கடந்த 1926-ம் ஆண்டு அக்டோபர் 1-ம் தேதி பொது சேவை தேர்வாணையம் தொடங்கப்பட்டது. நாடு சுதந்திரம் அடைந்த பிறகு கடந்த 1950-ம் ஆண்டு இந்த அமைப்பு, மத்திய அரசு பணியாளர் தேர்வாணையம் (யுபிஎஸ்சி) என்று பெயர் மாற்றம் செய்யப்பட்டது.
இதன்படி யுபிஎஸ்சி அமைப்பின் 100-வது ஆண்டு தினம் நேற்று கொண்டாடப்பட்டது. இதையொட்டி டெல்லியில் உள்ள பாரத் மண்டபத்தில்நடைபெற்ற விழாவில் பிரதமர் நரேந்திர மோடி பங்கேற்றார். அப்போது அவர் பேசியதாவது: தற்போது யுபிஎஸ்சி-யின் 100-வது ஆண்டு விழாவை கொண்டாடுகிறோம்.
லட்சக்கணக்கான இந்தியர்களின் கனவுகளை யுபிஎஸ்சி நனவாக்கி வருகிறது. இந்த அமைப்பின் மீது மக்கள் அசைக்க முடியாத நம்பிக்கையை வைத்து உள்ளனர். மாணவர்களின் நலன் கருதி காலதாமதம் இன்றி போட்டித் தேர்வுகளை நடத்த வேண்டும். காலத்துக்கு ஏற்ப தேர்வு நடைமுறைகளில் சீர்த்திருத்தங்களை அமல்படுத்த வேண்டும்.
கடந்த 1952-ம் ஆண்டு புள்ளி விவரங்களின்படி குடிமைப் பணி சேவையில் 3 சதவீத பெண்கள் மட்டுமே இருந்தனர். தற்போது 30 சதவீத பெண்கள் குடிமைப் பணி சேவையில் உள்ளனர். யுபிஎஸ்சி அமைப்புக்கு இதுவரை 4 பெண்கள் தலைமைப் பொறுப்பை ஏற்று உள்ளனர். கடந்த காலங்களை ஒப்பிடும்போது யுபிஎஸ்சி தேர்வு எழுதுவோரின் எண்ணிக்கை 45 சதவீதம் வரை அதிகரித்து உள்ளது.
நடப்பு 21-ம் நூற்றாண்டில் கால் பகுதியை கடந்துவிட்டோம். அடுத்த 25 ஆண்டுகள் மிகவும் முக்கியமானது. வரும் 2047-ம் ஆண்டில் வளர்ச்சி அடைந்த இந்தியாவை உருவாக்க வேண்டும். அதற்கு அனைத்து தரப்பு மக்களும் ஒன்றிணைந்து அயராது உழைக்க வேண்டும்.
யுபிஎஸ்சி மூலம் தேர்வாகும் அரசு ஊழியர்கள் நாட்டின் நலன், மக்களின் நலனை முன்னிறுத்தி செயல்பட வேண்டும். மக்களின் வாழ்க்கைத் தரத்தை மேம்படுத்த வேண்டும். நாடு முழுவதும் திறன்வாய்ந்த அரசு ஊழியர்களை யுபிஎஸ்சி தேர்வு செய்து வருகிறது.
இதன்மூலம் வளர்ச்சி அடைந்த இந்தியாவை உருவாக்க இந்த அமைப்பு மிக முக்கிய தூணாக செயல்படுகிறது. அரசு சேவைகளைப் பெற பல வாரங்கள் காத்திருப்பதை மக்கள் விரும்பவில்லை.
இன்றைய சூழலில் செயற்கை நுண்ணறிவு தொழில்நுட்பம் சில நிமிடங்களில் ஆயிரக்கணக்கான தரவுகளை ஆய்வு செய்து அளிக்கிறது.
எனவே அரசு துறைகளில் செயற்கை நுண்ணறிவு தொழில்நுட்பத்தை முழுமையாகப் பயன்படுத்தி பொதுமக்களுக்கு விரைவாக சேவை வழங்க வேண்டும்.
அதேநேரம் செயற்கை நுண்ணறிவு தொழில்நுட்பத்தின் மூலம் போலி வீடியோக்கள், புகைப்படங்கள், போலி செய்திகள் பரப்பப்படுவது உள்ளிட்ட பல்வேறு சவால்களும் எழுந்துள்ளன. இந்த சவால்களையும் திறம்பட எதிர்கொள்ள வேண்டும்.
யுபிஎஸ்சி தேர்வாணையம் இளைஞர்களின் அறிவுத் திறனை சோதித்து அரசுப் பணிக்கு அவர்களை தேர்வு செய்கிறது. அதோடு அவர்கள் எந்த நோக்கத்துக்காக அரசுப் பணியில் சேருகிறார்கள் என்பதையும் யுபிஎஸ்சி கண்டறிய வேண்டும்.
மக்கள் சேவையில் அவர்களுக்கு ஆர்வம் இருக்கிறதா என்பதைக் கண்டறிவது மிகவும் அவசியம். மக்கள் குரலே, மகேசன் குரல் என்ற கொள்கையின் அடிப்படையில் மத்திய அரசு செயல்படுகிறது.
மக்களுக்கு சேவை செய்வதே அரசு ஊழியர்களின் தலையாய பணியாக இருக்க வேண்டும். இவ்வாறு பிரதமர் நரேந்திர மோடி பேசினார்.