திருமலை: மைசூரு மகாராஜாவின் பரம்பரையினர் ஏழுமலையானுக்கு செய்த சேவைகள், கைங்கர்யங்கள், காணிக்கைகளுக்கு மதிப்பளித்து, கர்நாடக பக்தர்கள் தங்குவதற்கு திருமலை திருப்பதி தேவஸ்தானம் 7.5 ஏக்கர் நிலம் வழங்கியது. அங்கு கர்நாடக அரசு சத்திரம் கட்டியது. அருங்காட்சியகத்துக்கு எதிரே உள்ள இங்கு, ஏராளமான பக்தர்கள் முன்பதிவு செய்து குடும்பத்துடன் தங்கிச் செல்கின்றனர்.
இந்நிலையில், கர்நாடக முதல்வர் டி.கே. சிவக்குமார் தலைமையிலான அமைச்சரவை கூட்டத்தில் இச்சத்திரத்தை சுற்றுலாத்துறையிடம் ஒப்படைக்க தீர்மானம் நிறைவேற்றப்பட்டது. இதற்கு திருமலை திருப்பதி தேவஸ்தான அறங்காவலர் குழு உறுப்பினர் பானுபிரகாஷ் ரெட்டி, தெலுங்கு தேசம் உள்ளிட்ட கட்சிகளும், பல இந்து அமைப்புகளும் எதிர்ப்பு தெரிவித்துள்ளன.
இதுகுறிற்து பானுபிரகாஷ் ரெட்டி ‘இந்து தமிழ் திசை’க்கு அளித்த பேட்டியில் கூறியதாவது: திருமலையின் ஒவ்வொரு அடியும் ஏழுமலையானுக்கே சொந்தம். வேறு யாரும் உரிமை கொண்டாட முடியாது. மைசூரு மகாராஜாவுக்கு மரியாதை செலுத்தும் வகையிலேயே நிலம் ஒதுக்கப்பட்டது. ஆனால், கர்நாடக அரசு அதைச் சுற்றுலாத்துறைக்கு ஒதுக்கி, தனியாருக்கு வழங்கவும் திட்டமிட்டுள்ளது. இதன் பின்னணியில் ஒரு முன்னாள் காங்கிரஸ் எம்.பி. இருக்கிறார்.
கடைகள், ஓட்டல்கள் நடத்தி பல கோடி சம்பாதிக்க நினைக்கின்றனர். இது ஒருபோதும் நடக்காது. ஒரு அங்குலத்தைக்கூடத் தனியாருக்கு விட்டுக்கொடுக்க மாட்டோம். கர்நாடக அரசு இத்திட்டத்தைக் கைவிட வேண்டும். இல்லையேல், நிலத்தை தேவஸ்தானம் திரும்பப் பெறும். தேவஸ்தான சட்டம் 30/1987-ன்படி, இந்த சொத்துகள் ஏழுமலையானுக்கு மட்டுமே உரியவை.
இவற்றின் மீது கர்நாடக அரசுக்கு அதிகாரம் இல்லை. திருமலை வரும் கர்நாடக அமைச்சர்கள், எம்.பி, எம்.எல்.ஏ.க்களுக்கு நித்ய ஹாரத்தி கொடுக்க வேண்டும் என சிவக்குமார் பேசியதையும் யாரும் ஏற்கவில்லை. அறங்காவலர் குழு, அதிகாரிகளுடன் ஆலோசித்து அவருக்கு நோட்டீஸ் அனுப்பப்படும். புனிதத் திருத்தலத்தை வியாபார மையமாகவும் அரசியல் களமாகவும் மாற்ற முயல்வது நல்லதல்ல. இவ்வாறு அவர் கூறினார்.