சென்னை: நம்நாட்டின் வழிகாட்டுதல் பயன்பாட்டுக்கான ‘நேவிக்’ சேவைகள் மீட்டெடுக்கப்பட்டுள்ளதாக இஸ்ரோ தலைவர் வி.நாராயணன் தெரிவித்தார்.
அமெரிக்காவுக்கு ‘ஜிபிஎஸ்’ போல, நம்நாட்டில் தரை, கடல் மற்றும் வான்வழி போக்குவரத்து மற்றும் பாதுகாப்பு பயன்பாட்டுக்கு உதவும் இந்திய மண்டல வழிகாட்டுதல் செயற்கைக்கோள் அமைப்பு (ஐஆர்என்எஸ்எஸ்) உருவாக்க இந்திய விண்வெளி ஆய்வு நிறுவனம் (இஸ்ரோ) முடிவுசெய்தது. இதற்காக ரூ.1,420 கோடியில் ஐஆர்என்எஸ்எஸ் வரிசையில் 7 செயற்கைக்கோள்கள் விண்ணில் நிலைநிறுத்தப்பட்டன.
அதில் 3 செயற்கைக்கோள்கள் மட்டுமே தற்போது பயன்பாட்டில் உள்ளன. பழுதானவைகளுக்கு மாற்று செயற்கைக்கோள்களை தயாரித்து இஸ்ரோ விண்ணில் நிலைநிறுத்தி வருகிறது. அதன்படி இஸ்ரோ சார்பில் வடிவமைக்கப்பட்ட என்விஎஸ்-03 (ஐஆர்என்எஸ்எஸ் 1 எல்) செயற்கைக்கோள் ஜிஎஸ்எல்வி எப்-18 ராக்கெட் மூலம் ஸ்ரீஹரிகோட்டாவில் உள்ள ஏவுதளத்தில் இருந்து நேற்று முன்தினம் இரவு வெற்றிகரமாக செலுத்தப்பட்டது.
அதைத் தொடர்ந்து இஸ்ரோ தலைவர் வி.நாராயணன் செய்தியாளர்களிடம் கூறியதாவது: என்விஎஸ்-03 செயற்கைக்கோள் திட்டமிடப்பட்ட சுற்றுப்பாதையில் துல்லியமாக நிலைநிறுத்தப்பட்டது. நேவிக் தொழில்நுட்பம் மூலம் இருப்பிடம், வழிகாட்டுதல் மற்றும் நேரச் சேவைகளை வழங்க சுற்றுப்பாதையில் குறைந்தது 4 செயற்கைக்கோள்கள் தேவை. எனவே, இந்த ஏவுதலின் மூலம் நமது நேவிக் சேவைகளை முழுமையாக மீட்டெடுத்துள்ளோம்.
இதன்மூலம் 10,400-க்கும் மேற்பட்ட ரயில் இன்ஜின்கள், 64,000 மீன்பிடிப் படகுகள் நேரலையில் கண்காணிக்கப்படுகின்றன. வாகனங்களைக் கண்காணிக்க இதுவரை 50 லட்சத்துக்கும் மேற்பட்ட கருவிகள் பொருத்தப்பட்டுள்ளன. கடந்த முறை என்விஎஸ்-02 செயற்கைக்கோள் ஏவுதலில் பைரோ வால்வுகள் தொடர்பான தொழில்நுட்பச் சிக்கல் ஏற்பட்டது. தற்போது அனைத்து அமைப்புகளும் சிறப்பாகச் செயல்படுகின்றன.
நடப்பு நிதியாண்டில் 2 பிஎஸ்எல்வி, ஒரு ஜிஎஸ்எல்வி, எஸ்எஸ்எல்வி, ஜி1 மற்றும் ஒரு தனியார் ஏவுதல் என 6 திட்டங்களை செயல்படுத்த திட்டமிட்டுள்ளோம். அடுத்தடுத்து என்விஎஸ்-04, 05 செயற்கைக்கோள்கள் 5 மாத இடைவெளியில் செலுத்தப்படும். என் விஎஸ்-02-க்கு மாற்றுச் செயற்கைக்கோளும் செலுத்தப்படும்.
ககன்யான் திட்டத்தின்கீழ் இதுவரை 8,000-க்கும் மேற்பட்ட சோதனைகள் முடிக்கப்பட்டுள்ளன. மனிதர்களை விண்வெளிக்கு அனுப்புவதற்கு முன்பு 3 ஆளில்லா விண்வெளிப் பயணங்கள் மேற்கொள்ளப்படும். முதல் ஆளில்லா பயணத்துக்கான பணிகள் தற்போது நடைபெற்று வருகின்றன.
நேவிக் அமைப்பு இந்தியா மற்றும் அதைச் சுற்றியுள்ள 1,500 கி.மீ. தொலைவு வரையிலான பகுதிகளுக்கு வழிகாட்டுதல் சேவை வழங்கும் வகையில் வடிவமைக்கப்பட்டது. முதல்கட்டமாக 7 செயற்கைக்கோள்களைக் கொண்ட கட்டமைப்பை நிறைவு செய்வதே இலக்கு. பின்னர் உலகளாவிய சேவையாக விரிவுபடுத்துவது குறித்து ஆய்வு செய்யப்படும். செல்போன்களில் நேவிக் சேவையைப் பயன்படுத்த 7 செயற்கைக்கோள் கட்டமைப்பு முழுமையடைய வேண்டும். இவ்வாறு அவர் கூறினார்.
பிரதமர் மோடி வாழ்த்து: பிரதமர் நரேந்திர மோடி தனது சமூகவலைதளப் பக்கத்தில் வெளியிட்ட பதிவில் கூறப்பட்டுள்ளதாவது: இஸ்ரோ விஞ்ஞானிகள் மற்றும் பொறியாளர்களுக்கு எனது வாழ்த்துகளைத் தெரிவித்துக் கொள்கிறேன். இந்த ஏவுதல், நமது உள்நாட்டிலேயே உருவாக்கப்பட்ட செயற்கைக்கோள் வழிகாட்டுதல் அமைப்பான நேவிக்கை வலுப்படுத்துவதில் முக்கியமான முன்னேற்றமாகும்.
மேம்படுத்தப்பட்ட திறன்களைக் கொண்ட என்விஎஸ்-03 செயற்கைக்கோள், முக்கியத் தொழில்நுட்பங்களில் தற்சார்பை எட்டுவதற்கான நமது முயற்சிகளை மேலும் முன்னெடுப்பதுடன், மக்களுக்கு பயனளிக்கும் வழிகாட்டுதல் சேவைகளுக்கும் உதவும். நமது விஞ்ஞானிகளின் அர்ப்பணிப்பும், புதுமையான தொழில்நுட்பத் திறனும் தொடர்ந்து நாட்டுக்குப் பெருமை சேர்த்து வருகின்றன. இவ்வாறு அதில் கூறப்பட்டுள்ளது.