புதுடெல்லி: ப்ளூடூத் மூலம் இ-ரிக்ஷாக்களை கட்டுப்படுத்தி அத்துமீறல் நடப்பதால், பிளே ஸ்டோரில் இருந்து சீன செயலிகளை நீக்க உத்தரவிடப்பட்டுள்ளது.
டெல்லி, மத்திய பிரதேசம் உள்ளிட்ட வட மாநிலங்களில் இ-ரிக்ஷாக்கள் அதிக அளவில் பயன்படுத்தப்படுகின்றன. இந்த சூழலில்தான் சீன நாட்டின் செல்போன் செயலியான பிஏடி-பிஎம்எஸ் (BAT-BMS) செயலியை இ-ரிக்ஷாக்களை கட்டுப்படுத்துவதற்கு தவறாகப் பயன்படுத்தப்படுவதாகப் புகார் எழுந்தது.
சாலைகளில் செல்லும்போது இந்த செயலி மூலம் அருகில் உள்ள இ-ரிக்ஷாக்களின் லித்தியம் பேட்டரியை ப்ளூடூத் மூலம் சிலர் கட்டுப்படுத்துவதாக தெரிவிக்கப்பட்டுள்ளது. இந்த லித்தியம் பேட்டரியில் ப்ளூடூத் செயல்பாடு உள்ளது குறிப்பிடத்தக்கது. அதன் மூலம் ‘டிஸ்சார்ஜ் சுவிட்ச்’ என்ற ஆப்ஷனை சிலர் தேர்வு செய்து இ-ரிக்ஷாக்களின் இயக்கத்தை நிறுத்தி விடுகின்றனர்.
மேலும், சிலர் இந்த செல்போன் செயலி மூலம் ‘சார்ஜ் சுவிட்ச்’சையும் ஆப் செய்து விடுகின்றனர். இதனால் சாலைகளில் ஓடிக்கொண்டிருக்கும் இ-ரிக்ஷாக்கள் திடீர் திடீரென நின்று விடுகின்றன.
சீனாவில் தயாரிக்கப்பட்ட விலை குறைந்த பேட்டரிகளில் பாதுகாப்பு வசதிகள் பெரிய அளவில் இல்லை என்ற புகார் உள்ளது. இந்தக் காரணத்தால் 10 முதல் 15 மீட்டர் தூரத்தில் இருந்தே இ-ரிக்ஷா பேட்டரியை செல்போன் செயலி மூலம் சிலர் கட்டுப்படுத்தி வருகின்றனர் என்ற புகார் எழுந்துள்ளது.
தற்போது இதேபோன்ற செயலை பல்வேறு மாநிலங்களில் பலர் பரவலாகச் செய்து வருவதால் பிரச்சினை ஏற்பட்டுள்ளது. சாலைகளில் சென்று கொண்டிருக்கும் இ-ரிக்ஷாக்கள் திடீர் திடீரென நிற்பதால் போக்குவரத்து பாதிக்கிறது. வேடிக்கையாக ஆரம்பித்த விஷயம் தற்போது விபரீதமான நிலைக்கு சென்றுள்ளது.
சில மர்ம நபர்களின் இந்த விஷம செயல் காரணமாக தங்களது தினசரி வருமானம் பாதிக்கப்படுவதாக இ-ரிக்ஷா ஓட்டுநர்கள் வருத்தம் தெரிவித்து வருகின்றனர். இவர்களில் பெரும்பாலானோர் இ-ரிக்ஷாக்களை வாடகைக்கு எடுத்து இயக்கி வருகின்றனர். போதுமான ஓட்டம் இல்லாததால் வாடகைக் கட்டணத்தை உரிமையாளருக்குக் கொடுப்பதில் சிக்கல் எழுவதாகவும் அவர்கள் தெரிவித்துள்ளனர்.
இந்நிலையில், இந்த செயலி தொடர்பாக டெல்லி போக்குவரத்து துறை அமைச்சகம் விசாரணையை தொடங்கி உள்ளது.
இதையடுத்து செல்போனின் பிளே ஸ்டோரிலிருந்து சர்ச்சைக்குரிய பிஏடி பிஎம்எஸ்(BAT BMS) மற்றும் எபோச் லி-ஐயன்(Epoch Li-ion) ஆகிய செயலிகளை நீக்கவும் மத்திய அரசு உத்தரவிட்டுள்ளது.
இதுதொடர்பான உத்தரவை மத்திய எலக்ட்ரானிக்ஸ் மற்றும் தகவல் தொழில்நுட்ப அமைச்சகம் (எம்இஐடிஒய்) பிறப்பித்துள்ளது.