லக்னோ: நடிகை சாரா அலிகான் கேதார்நாத் கோயிலுக்கு சென்றதை பாவம் என தெரிவித்த உத்தர பிரதேசத்தை சேர்ந்த முஸ்லிம் மத குருவுக்கு சமூக வலைதளங்களில் கண்டனங்கள் குவிந்து வருகின்றன.
பிரபல பாலிவுட் நடிகையான சாரா அலிகான் சமீபத்தில் உத்தராகண்ட் மாநிலம் ருத்ரபிரயாக் மாவட்டத்தில் உள்ள பிரசித்தி பெற்ற கேதார்நாத் கோயிலுக்குச் சென்றார். இந்நிலையில், அகில இந்திய முஸ்லிம் ஜமாத்தின் தேசியத் தலைவரான மவுலானா ஷஹாபுதீன் ரஸ்வி பரேல்வி, “எந்தவொரு முஸ்லிமும் மற்றொரு மதத்தின் நம்பிக்கையில் பங்கேற்று, வழிபாடு நடத்துவதும், மதச் சடங்குகளைச் செய்வதும் ஷரியா சட்டத்தில் தடை செய்யப்பட்டதாகும். சாரா அலிகான் பாவம் செய்து விட்டார். அவர் மனம் திருந்த வேண்டும்” என தெரிவித்தார்.
மத குருவின் இந்த கருத்துக்கு சமூக வலைதளங்களில் கடுமையான விமர்சனங்கள் எழுந்துள்ளன. மத குருவை கண்டித்தும், நடிகை சாரா அலிகானுக்கு ஆதரவாகவும் பலரும் கருத்துகளை பதிவிட்டு வருகின்றனர்.
எக்ஸ் தளத்தில் ஒரு பயனர், “ஒரு வயது வந்தவரின் நம்பிக்கை, பிரார்த்தனைகள் மற்றும் ஆன்மீகத் தேர்வுகள் தனிப்பட்டவை. குற்றவுணர்ச்சி மூலமாகவோ அல்லது மனந்திரும்பும்படி வற்புறுத்துவதன் மூலமாகவோ எந்த மதகுருவும் அவற்றை ஆணையிட முடியாது” என குறிப்பிட்டுள்ளார்.