புதுடெல்லி: இந்தியாவின் முதல் புல்லட் ரயில் சேவை அடுத்தாண்டு இயக்கப்படும் என்று மத்திய ரயில்வே அமைச்சர் அஸ்வினி வைஷ்ணவ் தெரிவித்துள்ளார்.
உலக நாடுகளுக்கு இணையாக, இந்தியாவிலும் புல்லட் ரயில்கள் இயக்கப்படும் என, மத்தியில் ஆளும் பாஜக அரசு கடந்த 2017-ம் ஆண்டு அறிவித்தது. கடந்த 2021-ம் ஆண்டு இத்திட்டத்துக்கான கட்டுமானப் பணிகள் முழுவீச்சில் தொடங்கின. இந்தியாவின் முதல் புல்லட் ரயில் திட்டம் மும்பை - அகமதாபாத் இடையே சுமார் 508 கி.மீ. தூரத்துக்கு அமைக்கப்பட்டு வருகிறது.
இதுகுறித்து மத்திய ரயில்வே அமைச்சர் அஸ்வினி வைஷ்ணவ் கூறியிருப்பதாவது:
நாட்டின் முதல் புல்லட் ரயிலை இயக்குவதற்கான பணிகள் முழுவீச்சில் நடைபெற்று வருகின்றன. கடந்த செப்டம்பர் மாத நிலவரப்படி, 456 கி.மீ. நீளத்துக்கு தூண்கள் அமைக்கும் பணியும், 371 கி.மீ. நீளத்துக்கு உயர்மட்ட மேம்பாலப் பாதை அமைக்கும் பணியும் நிறைவடைந்துள்ளன. 299 கி.மீ. நீளத்துக்கு 6 லட்சம் ஒலி தடுப்புச் சுவர்கள் அமைக்கப்பட்டுள்ளன. 206 கி.மீ. நீளமுள்ள மேம்பாலப் பாதையில் 9,300 மின்சார மேல்நிலை கம்பங்கள் நிறுவப்பட்டுள்ளன.
நாட்டின் முதல் புல்லட் ரயில் சேவை அடுத்தாண்டு இயக்கப்படும். முதற்கட்டமாக சூரத் – வாபி இடையே தொடங்கப்படும். இவ்வாறு அவர் தெரிவித்துள்ளார்.