விஜயவாடா: ஆந்திர மாநிலம் விஜயவாடாவில் உள்ள என்.டி.ஆர். சுகாதார பல்கலைக்கழகத்தின் 40-வது ஆண்டு விழாவில் குடியரசு துணை தலைவர் சி.பி. ராதாகிருஷ்ணன் நேற்று சிறப்பு விருந்தினராக பங்கேற்றார்.
அப்போது, விழாவில் அவர் பேசியதாவது: மருத்துவ கல்விக்கு என்.டி.ஆர். அளித்த பங்கு மறக்க முடியாதது. நாட்டிலேயே முதல் சுகாதார பல்கலைக்கழகம் இங்குதான் உள்ளது. தெலுங்கு கங்கை திட்டம் மூலம் என்.டி.ராமாராவ் சென்னைக்கு குடிநீர் வழங்கும் திட்டத்தை அமல்படுத்தினார். அவர் இதுபோன்று பல மனிதாபிமான செயல்களில் ஈடுபட்டுள்ளார்.
விக்சித் பாரத்-2047 திட்டத்தின் கீழ், பிரதமர் மோடியின் ஆட்சியில் கடந்த 12 ஆண்டுகளில் மருத்துவ கல்லூரிகள் நம் நாட்டில் அதிகரித்துள்ளன. இந்த என்.டி.ஆர். பல்கலைக்கழகத்தில் இருந்து நோபல் பரிசு வெல்லும் மாணவர்கள் பலர் உருவாக வேண்டும். சர்வதேச அளவில் மருத்துவ பரிசோதனைகளை செய்து சாதனை புரிய வேண்டும். புற்றுநோய் போன்ற கடும் நோய்களுக்கு சரியான மருந்துகளை கண்டறிய வேண்டிய அவசியம் உள்ளது.
மருத்துவ துறையில் ஏஐ, டிஜிட்டல் மருத்துவம் போன்றவைகளுக்கு முக்கியத்துவம் அளிக்கப்பட்டு வருகிறது. இதில் நாம் வல்லுனர்களாக திகழவேண்டும். நவீன தொழில்நுட்பம் அதிகரித்தாலும், நாம் மனிதாபிமானத்தை கைவிட கூடாது. நோயாளிகளிடம் நாம் கருணையுடன் நடந்து கொள்ள வேண்டும். இவ்வாறு அவர் பேசினார்.
திருமலையில் சுவாமி தரிசனம்: முன்னதாக, சி.பி. ராதாகிருஷ்ணன் நேற்று காலை விஜயவாடாவில் இருந்து விமானம் மூலம் ரேணிகுண்டா விமான நிலையம் வந்தடைந்தார். அவரை ஆந்திர அமைச்சர் சத்யபிரசாத், திருப்பதி மாவட்ட ஆட்சியர் வெங்கடேஸ்வர் உட்பட பலர் வரவேற்றனர்.
பின்னர் அவர் திருமலைக்கு சென்றார். அதன் பின்னர் நேற்று மாலை ஏழுமலையானை குடியரசு துணை தலைவர் சி.பி. ராதாகிருஷ்ணன் தரிசனம் செய்தார். முன்னதாக, அவர் பேடி ஆஞ்சநேயரை தரிசித்தார். அவருக்கு ரங்கநாயக மண்டபத்தில் தீர்த்த பிரசாதங்கள் வழங்கி கவுரவிக்கப்பட்டது.