ஒருநாள் பயணமாக ஆந்திரா சென்ற தமிழக முதல்வர் விஜய் நேற்று விஜயவாடாவில் ஆந்திர முதல்வர் சந்திரபாபு நாயுடுவை அவரது இல்லத்தில் சந்தித்து நதிநீர் இணைப்பு குறித்து பேசினார்.
விஜயவாடா: கோதாவரி - கிருஷ்ணா - காவிரி நதி நீர் இணைப்பு திட்டம் குறித்து தமிழக முதல்வர் ஜோசப் விஜய், ஆந்திர முதல்வர் சந்திரபாபு நாயுடு உடன் சுமார் ஒன்றரை மணி நேரம் பேச்சு வார்த்தை நடத்தினார்.
தமிழக முதல்வர் ஜோசப் விஜய் நேற்று ஒரு நாள் பயணமாக ஆந்திர மாநிலம் சென்றார். விஜயவாடா விமான நிலையத்தில் அவரை ஆந்திர மாநில அமைச்சர் நாராயணா வரவேற்றார். முதல்வர் விஜய்யுடன் அமைச்சர்கள் ஆதவ் அர்ஜுனா, என்.ஆனந்த் ஆகியோர் சென்றிருந்தனர்.
பட்டு வேட்டி, சட்டையில் சென்றிருந்த முதல்வர் விஜய், விஜயவாடா கனக துர்க்கையம்மனை தரிசித்தார். அங்கிருந்து உண்டவல்லியில் உள்ள ஆந்திர முதல்வர் சந்திரபாபு நாயுடுவின் வீட்டுக்கு சென்றார். அங்கு சந்திரபாபு நாயுடு, தமிழக முதல்வர் விஜய்க்கு சால்வை அணிவித்து பூங்கொத்து கொடுத்து வரவேற்றார். பின்னர், தெலுங்கு - கங்கை கால்வாய் திட்டம், கோதாவரி - கிருஷ்ணா - காவிரி நதி நீர் இணைப்பு போன்ற விவகாரங்கள் தொடர்பாக இரு மாநில முதல்வர்களும் சுமார் ஒன்றரை மணி நேரம் பேச்சுவார்த்தை நடத்தினர்.
அப்போது, இந்த நதிகளை இணைப்பதன் மூலம் ஆந்திரா மட்டுமல்லாமல் தென் மாநிலங்கள் அனைத்தும் வளம் பெரும்.இதனால் மத்திய அரசின் உதவியுடன் நாம் அனைவரும் ஒன்றுபட்டு இந்த திட்டத்தை நிறைவேற்றுவோம் என முதல்வர் சந்திரபாபு நாயுடு பேசியுள்ளார்.
அதே சமயத்தில் தெலுங்கு கங்கை குடிநீர் கால்வாய் திட்டம் மூலம் ஆந்திராவில் இருந்து சென்னைக்கு குடிநீர் வழங்கப்பட்டு வருகிறது. ஆனால், ஒப்பந்தப்படி நீரின் அளவு வழங்கப்படுவதில்லை. இந்த ஆண்டு இதுவரை 4.08 டிஎம்சி அளவு மட்டுமே தண்ணீர் வழங்கப்பட்டுள்ளது. இந்த அளவை அதிகரிக்க வேண்டும் என்று முதல்வர் விஜய் கோரிக்கை வைத்தார்.
அதன் பின்னர், இரு மாநில முதல்வர்களும் ஒன்றாக சேர்ந்து விஜயவாடா பவுர்ணமி படித்துறை பகுதிக்கு சென்றனர். அங்கு ஏற்பாடு செய்திருந்த ‘விஜயவாடா உத்சவ்-2.0’ வில் கலந்து கொண்டனர். அப்போது அங்கு கூடியிருந்த ஏராளமான மக்கள் தமிழக முதல்வர் விஜய்யை பார்த்து உற்சாகமாக கை அசைத்தனர்.
கூட்டத்தில் ஒரு சிறுமி ‘விஜய் மாமா என்னுடன் ஒரு செல்ஃபி’ என ஒரு அட்டையில் எழுதி காண்பித்தார். அதனை பார்த்து மகிழ்ச்சி அடைந்த முதல்வர் விஜய், தனது கைகள் மூலம் சைகையில் இதயம் போன்று காண்பித்தார். இதையடுத்து ரசிகர்கள் ஆரவாரம் செய்தனர்.
அதன் பின்னர், ஆந்திர முதல்வர் சந்திரபாபு நாயுடு அங்கு ஏற்பாடு செய்திருந்த மேடைக்கு வந்து ‘பாரத் மாதாவுக்கு ஜே’ என பேச்சை தொடங்கினார்.
பின்னர் அவர் பேசியதாவது: தமிழக முதல்வர் விஜய்க்கு நீங்கள் தரும் உற்சாகத்தை பார்த்து எனக்கும் உற்சாகம் வருகிறது.
மாநிலங்கள் வேறுவேறாக இருந்தாலும் மக்களின் ரசிப்புத்தன்மை ஒன்றுதான். தமிழகம், ஆந்திரா, தெலங்கானா, கர்நாடகா போன்ற அனைத்து தென் மாநிலங்களும் வளமாக இருக்க வேண்டும்.
பிரதமர் மோடியின் ஆதரவுடன் கோதாவரி-கிருஷ்ணா-காவிரி நதி நீர் இணைப்பு நடந்தே தீரும். இது நடந்தால்தான் தென் மாநிலங்கள் அனைத்தும் வளர்ச்சி அடையும். நவராத்திரி உற்சவத்துக்கு வருகை தந்த முதல்வர் விஜய்க்கு எனது மனமார்ந்த நன்றி. இவ்வாறு சந்திரபாபு நாயுடு பேசினார்.
தெலுங்கில் பேசிய விஜய்: நவராத்திரி விழாவில் கலந்துகொண்ட தமிழக முதல்வர் விஜய் தெலுங்கில் பேசினார். அவர் பேசும்போது, ‘அந்தரிக்கி நமஸ்காரம்’ ஆந்திராவில் உங்கள் அனைவரையும் சந்தித்தது மிக்க மகிழ்ச்சியை அளிக்கிறது. உங்கள் அனைவருக்கும் நவராத்திரி பண்டிகை வாழ்த்துக்கள். கோதாவரி-கிருஷ்ணா-காவிரி நதி நீர் இணைப்பு குறித்து முதல்வர் சந்திரபாபு நாயுடுவுடன் பேச்சு வார்த்தை நடத்தியது எனக்கு மிகுந்த உற்சாகம் அளிக்கிறது” என்றார்.
முதல்வர் விஜயின் தெலுங்கு பேச்சை ஆந்திர மாநில மக்கள் உற்சாகத்துடன் வரவேற்றனர்.அதன் பின்னர், தமிழில் “என் நெஞ்சில் குடியிருக்கும் விஜயவாடா மக்கள் அனைவருக்கும் வணக்கம். நன்றி” என தனது பேச்சை முதல்வர் விஜய் நிறைவு செய்தார்.