புதுடெல்லி: இணையத்தைப் பயன்படுத்துவது 18 வயதுக்குட்பட்ட சிறார்களின் அடிப்படை உரிமை என்று உச்ச நீதிமன்றம் தீர்ப்பளித்து உள்ளது.
டெல்லியை சேர்ந்த ஜஸ்ட் ரைட்ஸ் பார் சில்ட்ரன் அலையன்ஸ் என்ற தன்னார்வ தொண்டு நிறுவனம் சார்பில் உச்ச நீதிமன்றத்தில் வழக்கு தொடரப்பட்டது. அதில், “18 வயதுக்கு உட்பட்ட சிறார் சமூக வலைதளங்களைப் பயன்படுத்த கட்டுப்பாடு விதிக்க வேண்டும். பெற்றோரின் மேற்பார்வையின் கீழ் அவர்கள் சமூக வலைதளங்களை பார்வையிட அனுமதிக்கலாம். இதுதொடர்பாக உச்ச நீதிமன்றம் உரிய உத்தரவுகளைப் பிறப்பிக்க வேண்டும்" என்று கோரப்பட்டது.
இந்த வழக்கு தொடர்பாக தன்னார்வ தொண்டு அமைப்பு மற்றும் மத்திய அரசு சார்பில் விரிவான வாதங்கள் முன்வைக்கப்பட்டன. அனைத்து தரப்பு வாதங்களையும் கேட்ட உச்ச நீதிமன்ற நீதிபதிகள் ஜே.பி. பர்திவாலா, கே.வினோத் சந்திரன் அமர்வு நேற்று தீர்ப்பு வழங்கியது. அதில் கூறியிருப்பதாவது: இந்திய அரசியலமைப்புச் சட்டம் 21-வது பிரிவின் கீழ் ஒவ்வொரு தனிநபருக்கும் இணையத்தைப் பயன்படுத்தும் உரிமை உள்ளது. இது அடிப்படை உரிமை ஆகும். சிறார்களுக்கும் இந்த உரிமை உண்டு.
வயது வித்தியாசம் இன்றி அனைத்து சிறார்களும் இணையத்தைப் பயன்படுத்தலாம். இது அவர்களின் அடிப்படை உரிமை ஆகும். இணையத்தில் ஏற்படும் ஆபத்துகளைக் காரணம் காட்டி குழந்தைகளுக்கான இணைய உரிமையை மறுக்க முடியாது. இந்த விவகாரம் தொடர்பாக கடந்த 2024-ம் ஆண்டில் உச்ச நீதிமன்றம் முக்கிய தீர்ப்பினை வழங்கி உள்ளது. இதனை சமூக வலைதள நிர்வாகங்கள் முறையாகப் பின்பற்றவில்லை.
இதுதொடர்பாக மத்திய அரசு உரிய நடவடிக்கை எடுக்க வேண்டும். சிறார் பாலியல் வன்கொடுமை சார்ந்த புகைப்படங்கள், வீடியோக்களை இணையதளங்களில் இருந்து நீக்க மத்திய அரசு நடவடிக்கை எடுக்க வேண்டும். இதில் தொடர்புடையவர்களுக்கு கடுமையான அபராதம், தண்டனைகளை விதிக்க வேண்டும். நமது சிறார்களைப் பாதுகாக்க வேண்டும். அதேநேரம் அவர்களின் உரிமைகளையும் உறுதி செய்ய வேண்டும். இவ்வாறு தீர்ப்பில் தெரிவிக்கப்பட்டு உள்ளது.