ஸ்ரீநகர்: ஜம்மு காஷ்மீர், கிஷ்த்வார் மாவட்டத்தின் தொலைதூரப் பகுதியான டாச்சன்-மார்வா பகுதியில், ராணுவத்தினருடன் இணைந்து, போலீஸ் அதிகாரிகளான ராஷ்பால் குமார் (40), பாபி சந்த் (54) ரோந்துப் பணியில் ஈடுபட்டிருந்தனர். அவர்கள் தேர்னா சோதனைச் சாவடிக்குச் சென்று கொண்டிருந்தபோது மாயமாகினர்.
இதையடுத்து, தேர்னா பாதுகாப்பு சோதனைச் சாவடியில் இருந்து சென்ற தேடுதல் குழுவினர் அவர்களை தேடும் பணியில் ஈடுபட்டனர். அப்போது, குண்டுகள் துளைத்த நிலையில் அவர்களது உடல்களைக் கண்டெடுத்தனர். அவர்களில் ஒருவரது தலையிலும், மற்றொருவரது முதுகிலும் துப்பாக்கிக் குண்டுகள் பாய்ந்த காயங்கள் இருந்தன. அவர்கள் வைத்திருந்த துப்பாக்கிகளும் காணவில்லை. இருவரையும் கொன்ற பின்னர் தீவிரவாதிகள் அந்த ஆயுதங்களை எடுத்துச் சென்றிருக்கலாம் என சந்தேகிக்கப்படுகிறது.
முதற்கட்ட தகவல்களின்படி, இருவரும் ராணுவத்தினருடன் இணைந்து ரோந்துப் பணியில் ஈடுபடுவதற்காக, தேர்னா சோதனைச் சாவடிக்குச் சென்று கொண்டிருந்த போது மாயமாகியுள்ளனர். முதலில் இருவரது செல்போன்களும் தொடர்பில் இருந்த நிலையில், பின்னர் அவை அணைக்கப்பட்டன. இதனால் பாதுகாப்புப் படையினருக்கு சந்தேகம் ஏற்பட்டது.
இருவரும் பணிக்குத் திரும்பாததால் தேடுதல் நடவடிக்கை தொடங்கப்பட்டது. இதையடுத்து, நேற்று தேர்னா டாப் பகுதியில் அவர்களது உடல்கள் மீட்கப்பட்டன. இந்தக் கொடூரச் செயலில் ஈடுபட்டவர்களைக் கைது செய்வதற்காக போலீஸாரும், பாதுகாப்புப் படையினரும் இணைந்து தேடுதல் வேட்டையைத் தீவிரப்படுத்தியுள்ளனர்.