பெங்களூரு: ‘‘சோசலிச கருத்துக்களை பேசிவரும் கர்நாடக முதல்வர் சித்தராமையாவும், துணை முதல்வர் டி.கே.சிவகுமாரும் ரூ.43 லட்சம் மதிப்புள்ள ஆடம்பர கைக்கடிகாரங்களை அணிந்திருப்பது ஏன்?'' என பாஜக கேள்வி எழுப்பியுள்ளது.
கர்நாடக முதல்வர் சித்தராமையாவும், துணை முதல்வர் டி.கே.சிவகுமாரும் ரூ.43 லட்சம் மதிப்புள்ள ‘சாண்டோஸ் டி கார்டியர்’ கைக்கடிகாரங்களை அணிந்திருக்கும் புகைப்படங்கள் அண்மையில் சமூக வலைத்தளங்களில் வைரலாயின.
இதனை கர்நாடக பாஜகவின் அதிகாரப்பூர்வ சமூக வலைதள பக்கங்களில் பகிர்ந்து, “'சித்தராமையாவும், டி.கே.சிவகுமாரும் தங்களை சோசலிச தலைவர்களாக சொல்லிக் கொள்கின்றனர். ஆனால் இருவரும் பெரும் பணக்காரர்கள் பயன்படுத்தும் ரூ.43 லட்சம் மதிப்புள்ள கைக்கடிகாரங்களை அணிந்துள்ளனர்.
சோசலிசம் என்றால் மிக உயர்ந்த விலை கொண்ட பொருட்களை பயன்படுத்துவது என்று அர்த்தமா? கர்நாடக மக்கள் வறட்சி மற்றும் மோசமான உள்கட்டமைப்புடன் பிரச்சினைகளில் சிக்கித் தவிக்கும்போது இந்த ‘எளிய சோசலிஸ்ட்’ தலைவர்கள் சாண்டோஸ் டி கார்டியரைக் கைக்கடிகாரங்களை அணிந்திருப்பது முரணாக இருக்கிறது” என விமர்சித்துள்ளது.
கடந்த 2016-ம் ஆண்டு சித்தராமையா ரூ.70 லட்சம் மதிப்புள்ள ஆடம்பர கைக்கடிகாரத்தை அணிந்திருந்ததால் பெரும் சர்ச்சை ஏற்பட்டது குறிப்பிடத்தக்கது.