புதுடெல்லி: உத்தர பிரதேசத்தில் 10, உத்தராகண்டில் 1 மாநிலங்களவை இடங்கள் விரைவில் காலியாக உள்ளன. இதுபோல மேற்கு வங்கத்தில் ஒரு இடம் காலியாக உள்ளது. இந்த 12 இடங்களுக்கும் அக்டோபர் 16-ம் தேதி அன்று தேர்தல் நடைபெற உள்ளது.
ஓய்வுபெறும் உறுப்பினர்களில் மத்திய அமைச்சர் ஹர்தீப் சிங் புரி, அருண் சிங், நீரஜ் சேகர், பிரிஜ்லால், மத்திய இணை அமைச்சர் பி.எல். வர்மா, சீமா துவிவேதி ஆகிய பாஜக தலைவர்கள், சமாஜ்வாதி கட்சியின் ராம் கோபால் யாதவ், பகுஜன் சமாஜ் கட்சியின் ஒரு உறுப்பினர் அடங்குகின்றனர். உ.பி.யில் காலியாக உள்ள பத்தில் எட்டு இடங்கள் பாஜகவிடம் உள்ளன.
கட்சியின் மத்தியத் தேர்தல் குழு ஒப்புதல் அளித்த 8 வேட்பாளர்களின் பட்டியலை கட்சியின் தேசியத் தலைமையகப் பொறுப்பாளர் தருண் சுக் வெளியிட்டார். அதில் தரம்பால் சிங், ராதாகாந்த் ஓஜா, பிரகாஷ் பால், வித்யாசாகர் சோன்கர், கோபி கிருஷ்ண பாண்டே, ராம் பிரதாப் சிங் சவுஹான் ஆகியோர் உள்ளனர். பிரியங்கா சிங் ராவத், ஸ்ருதி கங்வார் ஆகிய இரு பெண்களும் உள்ளனர்.
தரம்பால் சிங், பிரகாஷ் பால், ஸ்ருதி கங்வார் ஆகியோர் ஓபிசி வகுப்பைச் சேர்ந்தவர்கள். வித்யாசாகர் சோன்கர், பிரியங்கா சிங் ராவத் ஆகியோர் பட்டியலினத்தைச் சேர்ந்தவர்கள். இது 2027 சட்டப்பேரவைத் தேர்தலை மனதில் கொண்ட சமூகக் கணக்கீடாகக் கருதப்படுகிறது. பட்டியல் வெளியானதும் முதல்வர் யோகி ஆதித்யநாத் வேட்பாளர்களுக்கு வாழ்த்து தெரிவித்தார்.
மாநிலங்களவையில் பாஜக தலைமையிலான தேசிய ஜனநாயகக் கூட்டணிக்கு 150 இடங்கள் உள்ளன. உத்தர பிரதேச சட்டப்பேரவையில் தற்போது 396 உறுப்பினர்கள் உள்ளனர். ஒரு வேட்பாளர் வெற்றிபெற 37 முதல் விருப்ப வாக்குகள் தேவை. இதன்படி சமாஜ்வாதி கட்சிக்கு இரண்டு இடங்கள் உறுதியாகும். மீதமுள்ள இடங்களில் பாஜக கூட்டணிக்கு ஏழு அல்லது எட்டு இடங்கள் கிடைக்கும் என மதிப்பிடப்படுகிறது. எட்டாவது இடத்துக்கு போட்டி கடுமையாக இருக்கும் என கூறப்படுகிறது.