போபால்: ஐந்து சிறுமிகளை பாலியல் வன்கொடுமை செய்த வழக்கில், போபாலைச் சேர்ந்த செய்தித்தாள் உரிமையாளர் பியாரே மியானுக்கு 10 தொடர் ஆயுள் தண்டனைகளும், ரூ.77.64 லட்சம் அபராதமும் விதித்து போக்சோ சிறப்பு நீதிமன்றம் தீர்ப்பளித்தது.
சிறப்பு நீதிபதி குமுதினி சிங் வழங்கிய இந்தத் தீர்ப்பில், பியாரே மியானுக்கு (78) விதிக்கப்பட்ட 10 ஆயுள் தண்டனைகளில் 8 தண்டனைகள் ‘சாகும் வரை சிறை’ தண்டனையாகும். இவருக்கு உடந்தையாக இருந்த ரபியா பி என்பவருக்கு 20 ஆண்டுகள் சிறைத்தண்டனை விதிக்கப்பட்டுள்ளது.
வீட்டு வேலை மற்றும் ரூ.10,000 மாதச் சம்பளம் தருவதாகக் கூறி, ஏழைச் சிறுமிகளைக் குறிவைத்து 2014 முதல் பியாரே மியான் இந்த அநீதியை இழைத்து வந்துள்ளார். இவ்வழக்கில் பாதிக்கப்பட்ட சிறுமிகளுக்குச் சட்டவிரோதக் கருக்கலைப்பு செய்ய உதவியதாக மருத்துவர் ஹேமந்த் மிட்டல் என்பவருக்கு 5 ஆண்டுகள் சிறை தண்டனையும், உடந்தையாக இருந்த ஓவைஸ் என்பவருக்கு ஆயுள் தண்டனையும், ஸ்வீட்டி விஸ்வகர்மா என்பவருக்கு 20 ஆண்டுகள் சிறை தண்டனையும் ஏற்கெனவே விதிக்கப்பட்டுள்ளது.