புதுடெல்லி: டெல்லியில் நேற்று நடைபெற்ற உலக வளர்ச்சி அறிக்கை வெளியீட்டு நிகழ்வில் மத்திய மின்னணு, தகவல் தொழில்நுட்பத் துறை அமைச்சர் அஸ்வினி வைஷ்ணவ் கலந்து கொண்டு பேசினார்.
அப்போது அவர் கூறியதாவது: செயற்கை நுண்ணறிவு (ஏஐ) பாதுகாப்பு, டீப்ஃபேக்குகள் மற்றும் மனிதர்களுக்கு முன்னுரிமை அளிக்கும் அணுகுமுறை போன்ற முக்கிய அம்சங்களில் கவனம் செலுத்தி, ஏஐ ஒழுங்குமுறைகள் குறித்த கலந்தாய்வு அறிக்கையை ஒரு மாதத்துக்குள் அரசு வெளியிடும். இந்த அறிக்கை ஏஐ ஒழுங்குமுறைகளுக்கு அடிப்படையாக அமையும். இந்தியாவுக்கு அத்தகைய ஒரு கட்டமைப்பு அவசியம் தேவை.
ஏஐ பயன்பாடு தொடர்பான பாதுகாப்பு இந்த கலந்தாய்வு அறிக்கையின் முக்கிய அம்சமாக இருக்கும். டீப்ஃபேக்குகள் உள்ளிட்ட ஏஐ-ஆல் ஏற்படும் தீங்குகள், மனிதர்களுக்கு முன்னுரிமை அளிக்கும் அணுகுமுறை மற்றும் திறன் மேம்பாடு ஆகியவை கவனம் செலுத்தப்பட வேண்டிய மற்ற துறைகளாக இருக்கும்.
டீப்ஃபேக்குகள் சமூகத்தில் பெரும் பிரச்சினைகளை ஏற்படுத்தக்கூடிய ஒரு தொல்லையாக உருவெடுத்துள்ளது. அது முற்றிலும் தவறான ஒரு கதையை உருவாக்குகிறது. இதனால் மக்கள் தவறான காரியங்களைச் செய்யவும் தவறான விஷயங்களை நம்பவும் தூண்டப்படுகிறார்கள். ஏஐ மற்றும் பிற தொழில்நுட்பங்களை சட்டத்தால் மட்டுமே ஒழுங்குபடுத்த முடியாது என்று அரசு எப்போதுமே கூறி வருகிறது.
எனவே, நாம் ஒரு தொழில்நுட்ப-சட்ட ரீதியான தீர்வைக் கொண்டுவர வேண்டும். இணையப் பாதுகாப்பு, பயனர் பாதுகாப்பு, பயனருக்கு ஏற்படும் பாதிப்பு, மனநலக் கோளாறுகள் மற்றும் டீப்ஃபேக்குகள் போன்ற பிரச்சினைகளுக்கு முதன்மையான பொறுப்பைத் தொழில்துறைதான் ஏற்க வேண்டும். இவ்வாறு அவர் கூறினார்.