மும்பை: சமூக ஊடக கணக்கை நிர்வகிப்பவர்களுக்கு தாங்கள் பதிவேற்றிய வீடியோவை நீக்கும் அதிகாரம் இருப்பதாக மகாராஷ்டிர முதல்வர் தேவேந்திர பட்னாவிஸ் தெரிவித்துள்ளார்.
இது தொடர்பாக செய்தியாளர்களிடம் பேசிய தேவேந்திர பட்னாவிஸ், “மும்பை மாநகராட்சியை உயர் நீதிமன்றம் கண்டித்ததாக நான் நினைக்கவில்லை. நீதிமன்றம் ஒரு கருத்தை தெரிவித்திருக்கலாம். ஆனால், இந்த விவகாரம் முறையாக உயர் நீதிமன்ற விசாரணைக்கு வரவில்லை. எனவே, அங்கு கண்டனம் தெரிவிப்பதற்கான சூழலே எழவில்லை.
தியா மிர்சாவின் வீடியோ நீக்கப்பட்டது. அது மும்பை மாநகராட்சியின் முடிவு. சமூக ஊடக கணக்கை நிர்வகிக்கும்போது எதை வைத்திருக்க வேண்டும், எதை நீக்க வேண்டும் என்பதை தீர்மானிக்கும் அதிகாரம் அந்தந்த நிர்வாகத்துக்கு உண்டு. அவர்கள் அதைச் செய்திருக்கிறார்கள்.
தியா மிர்சா ஒரு சிறந்த நடிகையாக இருக்கலாம். ஆனால், அவர் நாட்டின் மிக முக்கிய தலைவர் அல்ல. எனவே, இது என் மட்டத்திலான விவகாரம் என்று நான் கருதவில்லை. என் மட்டத்திலான விஷயங்கள் குறித்து என்னிடம் கேளுங்கள்” என்று தெரிவித்தார்.
பின்னணி: மும்பை மாநகராட்சி சார்பில் மாசு இல்லாத தீபாவளி குறித்த விழிப்புணர்வு பிரச்சாரம் மேற்கொள்ளப்பட்டது. இந்த பிரச்சாரத்துக்காக நடிகைகள் தியா மிர்சா, மாதுரி தீட்சித், நிஷிகந்தா வாட், கிரிக்கெட் வீரர் அஜிங்கே ரஹானே உள்ளிட்ட பிரபலங்கள் நடித்த விழிப்புணர்வு வீடியோக்கள் மும்பை மாநகராட்சியின் சமூக ஊடக வலைதளப் பக்கங்களில் வெளியிடப்பட்டன.
இதில், “தியா மிர்சா தனது வீடியோவில், தீபாவளியை பொதுமக்கள் ஆரோக்கியமாக, பாதுகாப்பாக கொண்டாட வேண்டும். மும்பையில் அதிகரித்து வரும் காற்று மாசுவை கருத்தில் கொண்டு பொதுமக்கள் தீபாவளிக்கு பட்டாசு வெடிக்க வேண்டாம்.” என கேட்டுக்கொண்டார்.
தியா மிர்சாவின் இந்த வீடியோவுக்கு எதிர்ப்பு தெரிவித்த மும்பையைச் சேர்ந்த பாஜக எம்எல்ஏ அமீத் சதம், ‘தீபாவளியை எப்படி கொண்டாட வேண்டும் என்று தியா மிர்சா எங்களுக்கு பாடம் எடுக்கத் தேவையில்லை. எங்கள் பாரம்பரியம் எங்கள் கலாச்சாரத்தில் ஆழமாக வேரூன்றியுள்ளது’ என்று தெரிவித்திருந்தார். இதையடுத்து, தியா மிர்சாவின் வீடியோ மாநகராட்சி சமூக ஊடக பக்கங்களில் இருந்து நீக்கப்பட்டது.
இந்நிலையில், இந்த விவகாரம் தொடர்பான வழக்கை விசாரித்த மும்பை உயர் நீதிமன்ற நீதிபதிகள் கிரீஷ் குல்கர்னி மற்றும் நீலா கோகலே ஆகியோர் அடங்கிய அமர்வு, “சில அரசியல்வாதிகளின் பொறுப்பற்ற கருத்துக்கள் மிகுந்த மன வேதனையை அளித்துள்ளன. இந்தியா ஒரு மதச்சார்பற்ற நாடு. இவர்கள் நீதிமன்றத்தின் முந்தையை உத்தரவைக் கவனத்தில் கொள்ளாமல் கருத்துக்களைத் தெரிவித்துள்ளனர்.
மாநகராட்சி உறுப்பினர்கள் மற்றும் சில அரசியல்வாதிகளின் இந்த அணுகுமுறை சரியல்ல. அவர்கள் இதற்கு வேறு எந்த கோணத்தையும் கொடுக்கக்கூடாது. தியா மிர்சா நீதிமன்றத்தின் அறிவுறுத்தல்களின்படியே செயல்பட்டார்.
இது முற்றிலும் சுற்றுச்சூழல் தொடர்பான விவகாரம். இதற்கு வேறு எந்த பரிமாணத்தையும் கொடுக்காதீர்கள். நாம் அனைவரும் ஒரே காற்றைத்தான் சுவாசிக்கிறோம்.
நேற்று நடந்த நிகழ்வு (வீடியோ நீக்கப்பட்ட விவகாரம்) மிகவும் துரதிருஷ்டவசமானது. இது குறித்து நாங்கள் மிகுந்த வேதனை அடைகிறோம். இத்தகைய அவசரமான எதிர்வினை தேவையற்றது. அந்த வீடியோவில் பகிரப்பட்ட செய்தி, மதம், சாதி வேறுபாடின்றி அனைத்து மக்களுக்கும் நன்மை பயக்கும் வகையிலேயே இருந்தது.
சுற்றுச்சூழல் தொடர்பான விஷயங்களில் நாம் நல்லெண்ணத்தையும் ஒற்றுமையையும் சமூகத்துடன் ஒன்றிணைந்த உணர்வையும் வளர்த்துக்கொள்ள வேண்டும். இது என்ன மாதிரியான குறுகிய மனப்பான்மை. இதை நாங்கள் ஏற்றுக்கொள்ளவில்லை. ஒருவர் முன்வந்து விழிப்புணர்வை ஏற்படுத்தினால் அவரை ஏன் கண்டிக்க வேண்டும்?
சுற்றுச்சூழலுக்கு உகந்த தீபாவளியைக் கொண்டாடுவது குறித்த தியா மிர்சாவின் வீடியோவை மும்பை மாநகராட்சி நீக்கியது ஆழ்ந்த அதிருப்தியையும் வருத்தத்தையும் ஏற்படுத்தி உள்ளது. அந்த வீடியோவை மும்பை மாநகராட்சி மீண்டும் பதிவேற்ற வேண்டும்” என உத்தரவிட்டது.