புதுடெல்லி: பிறந்து வெறும் 28 நாட்களே ஆன குழந்தை ஒன்று பங்குச் சந்தையில் முதலீடு செய்து அனைவரது கவனத்தையும் ஈர்த்துள்ளது.
இதுகுறித்து, ஜெரோதா நிறுவனத்தின் இணை நிறுவனர் நிதின் காமத், “எங்களின் இளம் வாடிக்கையாளருக்கு தற்போது 28 நாட்கள்தான் ஆகிறது. அந்தக் குழந்தையின் பெற்றோர் ஜெரோதா நிறுவனத்தில் சிறார் கணக்கைத் தொடங்கினர். ஒரு வாரத்துக்குப் பிறகு முதல் முதலீட்டைச் செய்தனர்” என்று குறிப்பிட்டுள்ளார்.
கடந்த ஆண்டு இதே காலகட்டத்தில் அவர் வெளியிட்ட தகவலுக்குப் பிறகு, தற்போது இந்த புதிய சாதனை வெளியாகியுள்ளது. அப்போது, ஜெரோதாவின் இளம் கணக்குதாரர் 64 நாட்களே ஆன குழந்தையாக இருந்தது. ஒரே ஆண்டில் இளம் முதலீட்டாளரின் வயது கிட்டத்தட்ட பாதியாகக் குறைந்துள்ளது.
குழந்தைகள் வளர்ந்து பெரியவர்களாகும் வரை காத்திருக்காமல், பிறந்த சில நாட்களிலேயே அவர்களுக்காக முதலீடு செய்ய பெற்றோர் ஆர்வம் காட்டி வருவதை இது உணர்த்துகிறது. இது சமூக வலைதளங்களில் பலரது கவனத்தை ஈர்த்து, சுமார் 10 லட்சம் பார்வைகளைப் பெற்றுள்ளது.