விஜயவாடா: ரூ.5.84 கோடி மதிப்புள்ள 3 கிலோ தங்க பிஸ்கெட், வெளிநாட்டு கரன்ஸி நோட்டுகளை வைத்திருந்த 5 பேர் கைது செய்யப்பட்டனர்.
வங்கதேசத்தில் இருந்து கொல்கத்தா வழியாக ஹைதராபாத்துக்கு தங்கம் கடத்துவதாக ஹைதராபாத் மற்றும் விஜயவாடா வருவாய் புலனாய்வுத்துறை அதிகாரிகளுக்கு(டிஆர்ஐ) ரகசிய தகவல் கிடைத்தது. அதன்பேரில் விஜயவாடாவில் முகாமிட்ட அதிகாரிகள், ஹைதராபாத் நோக்கி செல்லும் கார்களை சோதனையிட்டனர். அப்போது, ஒரு காரின் ரகசிய அறையில் 60 ஆயிரம் அமெரிக்க டாலர்கள், 21,500 யூரோ கரன்ஸி பதுக்கி வைத்திருப்பது தெரியவந்தது.
இதுதொடர்பாக 2 பேரை அதிகாரிகள் கைது செய்தனர். இவர்கள் கொடுத்த தகவலின் பேரில், அதே வழியில் ஹைதராபாத்தை நோக்கி சென்ற பேருந்தில் சோதனையிட்டனர்.
அதில் பயணம் செய்த 3 பேர், தங்களின் இடுப்பில் அணிந்திருந்த பெல்ட்டில் 3.147 கிலோ எடையுள்ள 3 தங்க பிஸ்கெட்டுகள் வைத்திருந்தனர். தங்க பிஸ்கெட் மற்றும் வெளிநாட்டு கரன்ஸிகளின் மொத்த மதிப்பு ரூ.5.84 கோடி. அவற்றை பறிமுதல் செய்ததுடன் தொடர்புடைய 5 பேரையும் கைது செய்த அதிகாரிகள் அவர்களை நீதிமன்றக் காவலில் வைத்துள்ளனர்.