கோரக்பூர்: உத்தர பிரதேச சட்டப்பேரவைக்கு விரைவில் தேர்தல் நடைபெற உள்ளது. இதையொட்டி, முதல்வர் யோகி ஆதித்யநாத்தின் சொந்தத் தொகுதியான கோரக்பூரில் சமாஜ்வாதி கட்சியின் ‘பிடிஏ ரத யாத்திரை’ நேற்று நடைபெற்றது. இதில் பங்கேற்க சாலையில் பேரணியாக சென்ற அக்கட்சித் தலைவர் அகிலேஷ் யாதவை வரவேற்க, பூ இதழ்களை தூவிக் கொண்டிருந்த புல்டோசர் மோதியதில் 12 வயது சிறுவன் உயிரிழந்தான்.
அந்த சிறுவன் சவுரி சவுரா பகுதியில் உள்ள ராஜ்தானி கிராமத்தைச் சேர்ந்த ஆர்யவர்தன் சிங் (12). இதுகுறித்து ஆர்யவர்தனின் தந்தையும் உள்ளூர் பாஜக நிர்வாகியுமான ஓம்கார் சிங் கூறும்போது, “கேந்திரிய வித்யாலயா பள்ளியிலிருந்து எனது மகளை அழைத்து வருவதற்காக என் மகன் ஆர்யவர்தன் சாலையை கடந்து கொண்டிருந்தான்.
அப்போது, அகிலேஷின் வாகனங்கள் ஏற்கெனவே முன்னேறிச் சென்று விட்ட நிலையில், அதிவேகமாக வந்த புல்டோசர் இயந்திரம் பின்னால் இருந்து என் மகன் மீது மோதி உள்ளது. இதில் தலையில் பலத்த காயமடைந்ததால் உயிரிழந்தான்” என்றார். பேரணி அலட்சியம் குறித்தும், சமாஜ்வாதி கட்சியினரின் நடத்தைக்கும் பாஜகவினர் கண்டனம் தெரிவித்துள்ளனர்.