ஒருபக்கம் வெள்ளம், மறுபக்கம் வறட்சி... ஒரே ‘எல் நினோ’ இரு வேறு பாதிப்புகள் தருவது எப்படி?

உலக வானிலையைக் கட்டுப்படுத்தும் ரகசியக் கயிறு பசிபிக் பெருங்கடலின் கைகளில் இருக்கிறது. அங்கு வீசும் காற்றும், கடலின் வெப்பமும் மாறும்போது, உலகெங்கும் பருவகாலங்கள் தலைகீழாக மாறுகின்றன.

ஒரு நாட்டில் நதிகள் நிரம்பி வழிந்து வெள்ளப்பெருக்கு ஏற்படுவதற்கும், அதேநேரத்தில் மற்றொரு நாட்டில் நிலம் பிளந்து கடுமையான வறட்சி நிலவுவதற்கும் ஒரே இயற்கை நிகழ்வுதான் காரணம் என்றால், உங்களால் நம்ப முடிகிறதா? அதுதான் ‘எல் நினோ’ (El Niño).

அடுப்பில் தண்ணீரைச் சூடாக்கும்போது உருவாகும் நீராவியைப் போலத்தான், பெருங்கடலில் ஏற்படும் வெப்பமும் வளிமண்டலக் காற்றை மாற்றியமைக்கிறது. எல் நினோ மேகங்கள் உருவாகும் பாதையையே மாற்றி, வழக்கமாக மழை பெய்யும் இடங்களில் வறட்சியையும், வறண்ட இடங்களில் பெருமழையையும் தருகிறது. இந்த இயற்கை அதிசயத்தின் பின்னணியில் உள்ள எளிய அறிவியலைப் பார்ப்போம்.

எல்நினோ என்றால் என்ன?

எல்நினோ என்பது பசிபிக் பெருங்கடலின் மேற்பரப்பு நீர் இயல்பை விட அதிகமாக வெப்பமடைவதால் உருவாகும் உலகளாவிய காலநிலை நிகழ்வாகும். இது வளிமண்டலக் காற்றுச் சுழற்சி மற்றும் மழை மேகங்கள் உருவாகும் முறையை தலைகீழாக மாற்றுகிறது. இதன் மூலம், ஒரே எல்நினோ நிகழ்வு உலகின் ஒரு பகுதியில் கடுமையான வறட்சியையும், மறுபகுதியில் பெருவெள்ளத்தையும் ஏற்படுத்துகிறது.

சாதாரண சூழ்நிலைகளில்:

பசிபிக் பெருங்கடலில் நிலநடுக்கோட்டுப் பகுதியை நோக்கி வீசி, பின்னர் மேற்கு நோக்கிப் பாயும் காற்று (Trade Winds), மேற்பரப்பிலுள்ள வெப்பமான நீரை ஆசிய - ஆஸ்திரேலிய பகுதிகளை (இந்தோனேசியா மற்றும் அதனைச் சுற்றியுள்ள பகுதிகள்) நோக்கித் தள்ளிக் குவிக்கின்றன. வெப்பமான நீர் மேற்கு நோக்கி நகரும் போது, கிழக்கே தென்னமெரிக்கக் கடலோரப் பகுதிகளில் கடலின் ஆழத்திலிருந்து குளிர்ந்த நீர் மேலே எழும்பி அந்த இடத்தை நிரப்புகிறது.

இந்நிகழ்வு ‘குளிர்ந்த நீர் மேலெழும்புதல்’ (Upwelling) எனப்படுகிறது. இதனால்தான் மேற்கு பசிபிக் பகுதி வழக்கமாக கிழக்கு பசிபிக் பகுதியை விட மிக அதிக வெப்பத்துடன் காணப்படுகிறது.

எல் நினோ காலத்தில்:

மேற்கு நோக்கி வீசும் இந்த டிரேட் வின்ட்கள் மூலம் பலவீனமடைந்து திசைமாறி வீசுகின்றன. இதனால் மத்திய மற்றும் கிழக்கு பசிபிக் பெருங்கடலின் கடற்பரப்பு நீர் வழக்கத்தை விடக் கூடுதல் வெப்பமடைகிறது.

வாக்கர் சுழற்சியும் அதன் மாற்றமும்

பசிபிக் பெருங்கடலுக்கு மேலேயுள்ள வளிமண்டலத்தில் காற்று வட்டப்பாதையில் சுழலும் அமைப்பே வாக்கர் சுழற்சி (Walker Circulation) ஆகும்.

சாதாரண நாட்களில் வாக்கர் சுழற்சி:

மேற்கு பசிபிக்கில் கடல் நீர் மிகவும் சூடாக இருப்பதால், காற்று சூடாகி மேலே எழும்பி கனமழையைத் தருகிறது. உயரே மேலெழும்பிய காற்று கிழக்கு நோக்கி நகர்ந்து, தென்னமெரிக்கக் கடலோரத்தில் கீழே இறங்குகிறது. காற்று கீழே இறங்குவதால் மேகங்கள் கலைந்து, வறண்ட வானிலை உருவாகிறது. கீழே இறங்கிய காற்று, மீண்டும் டிரேட் வின்ட்களாக மேற்கு நோக்கிப் பாய்கிறது. பெருவின் லிமா நகரம் ஒரு முழு ஆண்டில் பெறும் மழையை விட, இந்தோனேசியாவின் சில பகுதிகள் ஒரே மாதத்தில் பெற்றுவிடும்!

எல் நினோ காலத்தில் மாற்றம்: எல் நினோ வரும்போது, கிழக்கு பசிபிக் கடல் நீர் திடீரெனச் சூடாகும். இதனால் வாக்கர் சுழற்சி தலைகீழாக மாறுகிறது:

1. கிழக்கு பசிபிக்கில் பெருவெள்ளம்: வழக்கமாக இந்தோனேசியாவில் மேலே எழும்ப வேண்டிய சூடான காற்று, இப்போது பசிபிக் கடலின் நடுப்பகுதியிலும் கிழக்கிலும் மேலே எழும்புகிறது. இதனால் வழக்கமாக வறண்ட மண்டலமான பெருவின் கடலோரப் பகுதிகளுக்கு மிக அதிக மழை மற்றும் பெருவெள்ளம் கிடைக்கிறது.

2. மேற்கு பசிபிக்கில் வறட்சி:

கிழக்கில் அதிக காற்று மேலே எழும்பும்போது, மேல் அடுக்கில் உள்ள காற்று மேற்கு பசிபிக் பகுதியின் (இந்தோனேசியா, ஆஸ்திரேலியா) மீது கீழ்நோக்கி இறங்குகிறது. கீழே இறங்கும் காற்று மேகங்கள் உருவாவதைத் தடுப்பதால், இப்பகுதிகள் கடுமையான வறட்சியைச் சந்திக்கின்றன. இந்நிலை இந்தோனேசியாவில் காட்டுத்தீ அபாயத்தையும் அதிகரிக்கிறது.

எல் நினோ எவ்வாறு உலகம் முழுவதும் பரவுகிறது?

எல் நினோவின் தாக்கம் பசிபிக் பெருங்கடலுடன் நின்றுவிடுவதில்லை. அறிவியலாளர்கள் இதனை ‘தொலைதூரத் தொடர்புகள்’ (Teleconnections) என்று அழைக்கிறார்கள்.

1. வளிமண்டல மேலடுக்கு வெப்பநிலை முறை:

சாஹேல் (Sahel) போன்ற இடங்களில், வெப்பமான காற்று மேலே எழும்புவதைக் கடினமாக்கி வறட்சியை அதிகரிக்கிறது.

2. வளிமண்டல அலைகள்:

காற்று மற்றும் மழை மேகங்கள் கிழக்கு நோக்கி நகரும் போது வளிமண்டலத்தில் பெரிய அலைகள் உருவாகின்றன. உதாரணத்துக்கு பிரிட்டனில்  எல் நினோ காலத்தில் இலையுதிர்காலத்தில் புயல் வானிலையும், பின்பனிக்காலத்தில் கடும் குளிரும் நிலவ வாய்ப்புகள் அதிகம்.

3. பிற பெருங்கடல்களின் தொடர்பு:

எல் நினோ, இந்தியப் பெருங்கடல் வெப்பநிலை ஏற்ற இறக்கங்களுடன் (Indian Ocean Dipole) இணைந்து ஆப்பிரிக்கா மற்றும் இந்தியாவின் பருவமழையை மாற்றியமைக்கிறது.

எல் நினோ மட்டுமே எந்தவொரு பகுதியின் வானிலையையும் முழுமையாகத் தீர்மானிப்பதில்லை. தாய்லாந்து மற்றும் இந்தியாவில் எல் நினோ காலத்தில் ஒட்டுமொத்தப் பருவமழை வறண்டதாக இருந்தபோதிலும், உள்ளூர் வானிலை மண்டலங்கள் காரணமாக பேங்காக் மற்றும் இந்தியாவின் சில பகுதிகளில் கடுமையான கனமழையும் வெள்ளமும் ஏற்படுகின்றன. எல் நினோ உலகளாவிய வானிலைச் சாத்தியக்கூறுகளை மட்டுமே மாற்றியமைக்கிறது.