சென்னை: முதல்வர் விஜய் நடித்துள்ள ‘ஜனநாயகன்’ திரைப்படம் மூலம் ‘குட் டச், பேட் டச்’ குறித்து அறிந்துகொண்ட 8 வயது சிறுமி தனக்கும் அதுபோன்ற கொடுமை நடந்ததாக தந்தையிடம் கூறினார்.
இதையடுத்து, சம்பந்தப்பட்ட நபரை போக்சோ சட்டத்தில் போலீஸார் கைது செய்துள்ளனர். சென்னையைச் சேர்ந்த தம்பதிக்கு 11 வயதில் மகனும், 8 வயதில் மகளும் உள்ளனர். கருத்து வேறுபாடு காரணமாக தம்பதியர் இருவரும் கடந்த சில மாதங்களாக பிரிந்து வாழ்கின்றனர். குழந்தைகள் இருவரும் தந்தையுடன் வசிக்கின்றனர்.
தாய் கோடம்பாக்கத்தில் உள்ள ஒரு வீட்டில் தங்கி, வேலை செய்து வருகிறார். தான் வேலை செய்யும் வீட்டுக்கு அவ்வப்போது குழந்தைகளையும் அழைத்துச் செல்வது வழக்கம்.
இந்நிலையில், கடந்த 30-ம் தேதி தந்தை தனது மகளை அழைத்துக் கொண்டு ‘ஜனநாயகன்’ திரைப்படத்துக்குச் சென்றுள்ளார். படத்தில் இடம்பெற்ற ‘குட் டச், பேட் டச்’ தொடர்பான காட்சியைப் பார்த்த சிறுமி, படம் முடிந்த பிறகு தந்தையிடம், தனக்கும் இதுபோன்ற சம்பவம் நடந்துள்ளதாக தெரிவித்துள்ளார்.
இதைக் கேட்டு அதிர்ச்சியடைந்த தந்தை, யார் இதுபோன்ற செயலில் ஈடுபட்டார் என்று கேட்டுள்ளார். தாய் வேலை செய்யும் வீட்டுக்குச் சென்றபோது, அந்த வீட்டின் உரிமையாளர் தன்னிடம் தவறாக நடந்துகொண்டதாக சிறுமி கூறியுள்ளார்.
இதுகுறித்து வடபழனி மகளிர் காவல் நிலையத்தில் தந்தை புகார் கொடுத்தார். சிறுமியிடம் போலீஸார் விசாரித்ததில், பாலியல் அத்துமீறல் நடைபெற்றது உறுதி செய்யப்பட்டது. இதையடுத்து, வீட்டு உரிமையாளர் சண்முகப் பிரியன் (40) மீது போக்சோ சட்டத்தின்கீழ் போலீஸார் வழக்கு பதிவு செய்து, அவரை கைது செய்தனர்.
இதுகுறித்து சமூக ஆர்வலர்கள் கூறியபோது, ‘‘பாலியல் குற்றங்கள், குறிப்பாக சிறார்கள் மீதான பாலியல் துன்புறுத்தல்களைத் தடுப்பதில் விழிப்புணர்வு மிக முக்கிய பங்கு வகிக்கிறது. அதிலும், சிறுவர்கள் விரும்பிப் பார்க்கும் திரைப்படத்தில் ‘குட் டச், பேட் டச்’ குறித்த காட்சி இடம்பெற்று, அதன்மூலம் ஒரு சிறுமியிடம் விழிப்புணர்வும் ஏற்பட்டுள்ளது.
அந்த திரைப்படத்தைப் பார்த்தபோது, தன் மீது பாலியல் அத்துமீறல் நடந்துள்ளது என்பதை புரிந்துகொண்ட சிறுமி, உடனடியாக தந்தையிடம் தெரிவித்துள்ளார். தங்கள் மீது பாலியல் அத்துமீறல் நடந்தால், குழந்தைகள் மறைக்காமல், தைரியமாக பெற்றோர், ஆசிரியர் அல்லது நம்பகமான பெரியவர்களிடம் தெரிவிக்க வேண்டும் என்ற விழிப்புணர்வை திரைப்படக் காட்சி ஏற்படுத்தியுள்ளது’’ என்றனர்.