சக்திவேல்
திருப்பத்தூர்: திருப்பத்தூர் தொகுதியில் வாக்களித்ததை செல்போனில் வீடியோ எடுத்து அதை சமூக வலைதளங்களில் பதிவேற்றம் செய்த தவெக நிர்வாகியை போலீஸார் நேற்று கைது செய்தனர்.
திருப்பத்தூர் மாவட்டம் கந்திலி அடுத்த குனிச்சி பகுதியைச் சேர்ந்தவர் ஓட்டுநர் சக்திவேல் (30). இவர், சமீபத்தில் தவெகவில் இணைந்து அக்கட்சி சார்பில் போட்டியிடும் தவெக வேட்பாளர் மருத்துவர் திருப்பதியுடன் தீவிர தேர்தல் பிரச்சாரத்தில் ஈடுபட்டு வந்தார்.
இந்நிலையில், குனிச்சி அரசு மேல்நிலை பள்ளியில் அமைக்கப்பட்டுள்ள வாக்கு சாவடி மையத்துக்கு சக்திவேல் நேற்று காலை தனது வாக்கினை செலுத்த சென்றார்.
அப்போது, அங்கு வாக்காளர்கள் செல்போன்களை வாக்கு பதிவு மையத்துக்குள் எடுத்து செல்லக்கூடாது என தேர்தல் அதிகாரிகள் விதித்த கட்டுப்பாட்டை மீறி சக்திவேல் தன்னுடைய செல்போனை மறைத்து வாக்கு பதிவு மையத்துக்குள் எடுத்துச்சென்றுள்ளார்.
அங்கு தவெக வேட்பாளருக்கு விசில் சின்னத்தில் பொத்தானை அழுத்தி, விவிபாட் இயந்திரத்தில் வந்த ஒப்புகைச் சீட்டை வீடியோ எடுத்து அதை சமூகவலைதளங்களில் பதிவேற்றம் செய்தார்.
இந்த வீடியோ வைரலானது. விதிகளை மீறிய சக்திவேல் மீது நடவடிக்கை எடுக்க கோரிக்கை எழுந்தது. இதன்பேரில் கந்திலி போலீஸார் வழக்குப்பதிந்து அவரை கைது செய்தனர்.